嚟緊星期日係母親節，好多孝順仔女已經準備節目𠱁媽媽開心，早前香港婦女中心協會同德福廣場就合辦咗個「母親節乖仔乖女選舉」，市場調查選出「媽媽眼中的乖仔乖女」，噚日馮仁昭去八卦個結果，至目前為止，佢哋訪問咗300位母親，喺演藝界別裏面，劉德華暫時以最高票數領先，得票率達40%，大概有120位媽媽覺得佢叻仔又乖又孝順。第二位係得票率佔36%嘅張學友，佢同華仔加埋已經佔咗約230票，睇嚟一講乖仔，媽媽們都不期然諗起佢兩個。
蔡少芬排第三
剩番大約70票就由蔡少芬、陳奕迅、楊千嬅、周星馳、鄭欣宜同容祖兒等瓜分，其中以蔡少芬得票較多，有近10%票數，暫時排第三。眾所周知蔡少芬早年經常要幫阿媽還賭債，搞到關係決裂，但切肉不離皮，阿媽點唔啱都係自己阿媽，蔡少芬已經同媽媽冰釋前嫌，早前佢結婚都淚眼感謝媽媽嘅養育之恩，可能因此令媽媽們對佢有好感。
不得不提一吓方力申，佢竟然出現喺運動界別，仲排第二，唔通啲媽媽覺得佢做運動員時乖仔啲？呢個調查仲未完，主辦單位希望可以訪問到500位媽媽，到時佢哋會請得票最高嘅藝人嘉賓出席母親節活動，同啲媽媽們同歡樂。
