香港啲醫院接連爆出遺失病人資料，原來西班牙都有類似案件，受害者就係巴塞隆拿球星朗拿甸奴；呢份由醫生口中漏出嘅驗身報告，踢爆右腳肌肉傷咗嘅「細哨」，好難重返巔峯，仲有可能掛靴，慘情指數比得上召妓後形象破產嘅「大哨」朗拿度。
據西班牙《ADN》報章周二透露，上周「細哨」一朝早從後門「鼠」入巴塞隆拿嘅LeDelfos診所，接受一系列放射性測試，結果係：「災難！比想像中嚴重，好難恢復舊日水準！」雖然負責醫生唔肯透露邊間球會要求做測試，不過就話係牽涉轉會事宜，咁即係指AC米蘭啦！
兩「妓女」還大哨清白
唔怪得之前對「細哨」好癡情嘅AC班主貝盧斯科尼，最近會突然出來講：「我一直懷疑『細哨』加盟會幫到咩手，好似唔係好啱我哋！」變臉變得咁快，真不愧係新任意大利總理！又難怪老貝咁絕情，邊個見到份報告唔調頭走㗎？何況，最近「大哨」召妓單嘢已經搞到佢頭都大，仲敢整多件「細哨」咩？
講開「大哨」單嘢亦有新進展，兩位變性妓女周二推翻之前口供，承認冇同佢發生性行為，亦冇服食毒品。「大哨」總算喺法律上挽回清白，不過佢嘅形象就徹底破產，商業價值插水。唔知各位讀者覺得「細哨」慘啲，定係「大哨」慘啲呢？
我求大俠就話最慘係雙失嘅巴塞喇！原來「細哨」驗身呢單嘢，會方一直被蒙在鼓裏。其實巴塞一直唔想「細哨」走，反而希望今夏賣走伊度奧（可能去熱刺），不過𠵱家「細哨」驗身報告一曝光，留佢又冇料到，又賣唔到好價錢，正式係人又冇錢又冇。
話說回頭，「大細哨」嘅遭遇好值得其他球員警惕，一定要識得保護自己同保養對腳，如果唔係盞好快玩完，千祈要記住富貴如浮雲啊！