香港貴為國際金融中心，除咗金融制度健全，更重要係人才出眾。尤其嗰啲年紀輕輕嘅後生仔，更加唔好小覷。浸會大學工商管理學院4名學生，參加今個月1號喺美國紐約舉行嘅全球投資分析比賽，擊敗嚟自歐美嘅代表隊伍，勇奪全球總冠軍。
咁勁，獎品當然要有番咁上下，佢哋獲邀喺上個禮拜五，主持美國納斯達克收市嘅敲鐘儀式，真係威水。
獲邀納斯達克敲鐘儀式
呢次比賽由CFA協會主辦，吸引全球300多名嚟自80間大學嘅學生參加，賽事歷時逾7個月，浸大生過五關，斬六將，先後打敗嚟自本地、上海、新加坡、印度、印尼嘅對手，之前已先後贏得大中華區、亞太區比賽冠軍。
今次比實要求各大學嘅隊伍分析一家上市公司嘅股價，浸大隊伍揀咗中移動，分析大陸電訊業重組對中移動嘅影響，分析結論係中移動現價仍屬偏低，咁究竟家陣仲有幾多水位賺呢？有機會要問吓4位同學。