有玩開任天堂遊戲必定玩過《薩爾達傳說》，而又必定認識當中主角林克。今次《林克的十字弓訓練》雖然一樣係由林克當主角，不過玩法就完全不同，曾在《薩爾達傳說》系列出現過的敵人角色，都有機會成為箭靶，讓玩家用體感方式射擊！最新推出的日版，更會連同WiiZapper一同發售，屋企開弓，玩落更自然更投入。
Remote扮十字弓
雖然同樣係林克做主角，不過同經典級的《薩爾達傳說》不同，再不是RPG玩法，玩家亦毋須再上網找攻略。新作《林克的十字弓訓練》基本上係一隻簡單射擊遊戲，玩法也差不多，唯一不同係會利用Wii體感手掣操作，用家只要拿住WiiRemote瞄準屏幕內敵人即可。玩落就會發覺敵人都熟口熟面，主要因為敵人角色都係參考自《薩爾達傳說》，Fans們以前幾經辛苦才打倒敵人，現在就可以射個痛快。另外，林克於遊戲內一向沒用槍，所以今集拎住的武器其實係十字弓，但都只係裝樣子，不影響操作。
四人搶射過癮
講開玩法，雖然話係普通射擊遊戲，但因為畫面會出現好多不同敵人，要射中自然比較難；再加上佢哋一直移動，好講求玩家的反應同眼力。要留意係每個版圖都會設有道具箱，只要眼明手快，射爆佢就可以得到特別道具及分數，單人玩仲有機會創出高分！遊戲還有四人同玩模式，四人玩時會共用同一個畫面，瞄準器各自有不同顏色，玩法雖然普通啲，都係鬥高分數，但作為Party遊戲其實就好適合。
騎馬追擊更難
任天堂遊戲都有個特色，就係喜歡加入各式迷你小遊戲，《林克的十字弓訓練》當然亦不例外，有多個小遊戲可以選擇。不過講到最特別，都係一個騎馬迷你遊戲，林克於遊戲內經常都會騎馬，於這個迷你遊戲內，林克會騎上馬去追擊敵人，而玩過之後就發覺難度比普通模式還要高。因為騎馬時除了一直移動外，馬仔仲好似不太聽話，經常上下搖動，射擊準確度自然降低不少！另一個好玩係類似第一身射擊遊戲，可以看小地圖顯示敵人，又可以自由移動，玩落更有趣味。
主機：Wii
遊戲廠商：1-4人
類型：射擊
售價：$248
查詢：I-Gamer（27253338）