台灣小馬哥上場，兩岸為咗想盡快落實三通而密密開會，但講到快手快腳，就拍馬都追唔上兩地嘅「人才」流通。近期最出力推動人才輸送嘅，就一定係招商銀行（3968），據台灣《經濟日報》報道，招行一口氣就喺台灣挖咗三個金融界高層返內地，主力開拓招行嘅私人銀行同財富管理服務。
今勻被人挖過岸嘅主角，分別係中信銀行（998）私人銀行部副總經理陳允柟、台新銀行協理楊誠信，同埋全球人壽銀行保險最高主管蔡燦煌。計及早前中信仲躋偉，家吓招行至少有6至7個台籍主管，台灣幫影響力真係唔小。
陳允柟係中信嘅區域中心主管，轄下有18個分行，佢同哥哥陳允懋一門雙傑，後者係瑞士銀行台灣區董事總經理，家下兩兄弟一中一台，各有發展。
至於楊誠信同埋蔡燦煌，前者兩年前先喺台新銀行返工，後者更加只係履新三四個月就跳槽，睇嚟台灣人才喺大陸嘅叫座力，真係幾勁。