工銀亞洲（349）噚日喺香港仔開第42間分行，做主禮嘅董事兼副總經理黃遠輝話，咁多間分行開張，呢間印象最深刻，皆因門口地方夠闊落，所以醒獅表演用嘅梅花樁，高過晒之前嗰啲，開頭佢仲擔心咁高，唔知隻「獅」上唔上到去㖭。
雖則運動唔係黃遠輝嘅強項，但華華同佢講開京奧，佢都鬼咁投入，仲話傳聖火嗰日雖則要返工，但當聖火經過辦公室樓下時，佢都有喺窗口度親眼目擊火炬手跑過，有機會最想就係可以現場睇開幕禮，不過到家吓都未撲到飛。
咁佢閒時又有冇做運動呢？佢話公餘最常就係打羽毛球，若有機會參加奧運，最想就係同中國出產嘅羽毛球世界冠軍林丹打番場比賽。咁有冇諗過同欄王劉翔跨番幾個欄呢又？佢就話中一嗰陣學校運動會都試過跨欄同跑800公尺，銀行運動日又試過跑400公尺，但同劉翔跑，一定連塵都食唔到，所以諗都唔敢諗嘞！