公司最脆弱嘅時候，應該係準備上市之時。呢期有3家公司招緊股，最矚目嘅應該係衣念時裝（749），有大班員工幫佢「贈興」！
噚日，衣念母公司南韓衣戀集團十個員工，由於唔滿意公司舊年解僱咗超過1000名員工，所以趁衣念上市，拉晒「抗．議．衣．念！」橫額，用三步一跪拜方式，由中環長江中心操到去花旗銀行大廈，沿途仲經過衣念上市保薦人公司瑞銀、高盛及花旗。
如果大家記得05年，世貿部長級會議喺香港舉行期間，啲特登嚟香港示威嘅南韓農民同工人，連警車都差唔多推倒，就知南韓工人唔好惹。
今日再嚟絕食示威
今次工人代表金錫元話，希望話畀香港啲股民知，衣念母公司衣戀每年都因為剝削勞工同壓制工會而發生勞資糾紛。金錫元已經罷工11個月，佢希望母公司正視勞資糾紛，畀被解僱嘅工人復工，佢仲話今日會再去衣念嘅辦公室示威及絕食。
電郵：mailto:[email protected]