半紅不黑嘅藝人，好鍾意改名轉運，印象當中，由於改名而紅起上嚟嘅，好似冇邊幾個。除咗娛樂圈，中國網絡資本（383）主席莊淑涴都改咗名，華華噚日睇公司07年度年報，佢新名叫莊舜而，至於點解要改名，係咪同風水命理有關，華華唔識佢，可能要等公司開股東會時見到面先問到。
上市公司改名就要股東通過，但上市公司主席改名唔止唔使股東通過，連公佈都可以唔使。不過，翻查資料，莊舜而喺舊年8月嘅上市通告已經用新名，但可能大家對佢唔係咁認識，所以冇乜聽人講。
講番上市公司主席改名，並唔常見，華華印象當中要數到前三商行主席賴雁浪，佢係Theme時裝掌舵人，97年改名做賴衍豐，點知唔改猶自可，一改就喎呵，衰嘢一件接一件，直至用番原名賴雁浪先至甩到啲衰氣。所以話「唔怕生壞命，最怕改壞名」，有時真係唔到你唔信。