搵夠退休唔使做係八方自小最大夢想，可惜有排未能夠實現，唔似得奧運祥雲火炬咁好命，一「舉」完成歷史任務就光榮退休，長嘆！八方唔敢奢望有退休生活，火炬退休生活就精采得多。立法會主席范太做完火炬手，決定將支火炬送畀立法會，擺喺立法會大樓宴會廳展覽，供來賓參觀。
全香港得120人有幸做火炬手，好多人都想嘗嘗舉起火炬滋味，范太大方到底，聽日起至16號，容許其他議員同立法會秘書處職員揸住支火炬影相，一於要支火炬畀人舉番夠本先退休。范太做多幾個月就拜拜，可以考慮退休後返立法會客串做佈景板。
其他火炬退休生活未必咁他條，「星之子」陳易希支火炬為國爭光後，仲要為科學捐軀，遭陳易希解剖研究。陳易希話火炬暫存科大宿舍，第日會放喺母校譚李麗芬紀念中學。身兼港協暨奧委會會長嘅霍公子表示，自己代表港協做火炬手，所以會將火炬長放港協暨奧委會總部留念。
拎火炬落區畀人任摸
荃灣區議會主席周厚澄噚日講起傳送火炬盛況仍然好亢奮，佢話火炬珍貴，要放喺辦公室日望夜望。新界社團聯會理事梁嘉銘支火炬生成勞碌命，近日要跟住佢巡迴葵青區畀街坊任摸，梁嘉銘話街坊見到火炬就好high，摸到支火炬開始甩色㖭！中國人滿天神佛，將火炬當神咁拜，希望沾到祥雲福氣都唔係冇可能。
珊珊帶返大女幼稚園
「風之后」珊珊透露，日前將火炬帶返大女希皚就讀嘅預備班，畀老師、同學仔分享喜悅，佢丈夫黃德森更從深圳返香港幫手影相，「我想囡囡知道開心嘅事，係可以同人哋分享，我哋想訂做一個玻璃箱放置火炬，因為傳送火炬係個難忘回憶。」
年紀最輕、14歲火炬手趙頌熙，應校長邀請將火炬帶返喇沙小學及中學部，畀老師、同學拍照，佢話會將火炬當做母親節禮物送畀媽咪。趙媽媽就話，會將火炬擺喺屋企客廳，因為係傳家之寶。壁球「小旋風」趙詠賢希望有支獨一無二火炬，稍後會喺火炬上刻上自己名字同傳送火炬日期，「火炬冇我個名，我好想刻番個名上去作為紀念。」
mailto:[email protected]
三大火炬退休計劃
1〉抽水叨光
范太將火炬送畀立會展覽同借畀議員揸住影相。
2〉頌親恩
14歲趙頌熙會將火炬送畀媽咪做母親節禮物。
3〉捨身捐軀
星之子陳易希已將火炬解剖研究。
