即將參選立法會嘅四名民主黨「第二梯隊」成員張賢登、黃成智、胡志偉同甘乃威，上星期低調北上，更一度被公安監視。佢哋北上唔係同中間人密會或闖關，而係到深圳為民主黨拍攝08年立法會選舉MV。
鄧小平畫像前取景
為咗顯示民主黨樂意同中方溝通，民主黨特別去深圳取景，拍攝當日，一行人坐民主黨主席何俊仁細佬何俊麒架私家車，同導演一齊過關，之後去市中心鄧小平畫像、深圳交易所、舊書城同羅湖城等地，分別講述民主黨對民主、經濟、教育同環保嘅政綱。
黃成智負責講民主黨願意加強與中央溝通，但唔會放棄爭取普選原則，呢幾句對白喺香港好多人滾瓜爛熟，喺內地卻唔可以隨便講。黃成智話拍攝途中，有兩個公安喺附近徘徊，見到有人監視，佢話有啲擔心拍攝被阻撓，不過兩個公安冇進一步行動。
為免夜長夢多，黃成智讀完對白就急急腳走人，臨走時兩個公安仲同幾個民主黨人點頭微笑。香港民主派素來精於喊口號，行動方面獨沽一味上街遊行，公安對此應該好了解，成班人得個講字，梗係懶得干涉啦。