04年4月開始停牌嘅大凌集團（211），復牌之日遙遙無期。聲稱完全冇公司大股東張志誠家族泵水贊助嘅「大凌小股東權益關注組」，早排喺多份報章發公開信，噚日終於成功「號召」超過200名小股東，拉晒橫額標語，操去中環港交所（388）總部國金一期請願，要求復牌。
正所謂「三軍未動，糧草先行」，所以大家先約喺上環一間酒樓開會，飲杯茶食個包先有氣有力請願嘛！聲稱個人一年內花咗30萬港紙「為大家爭取權益」嘅關注組主席蕭炎坤話，聽到消息，大凌董事會申請過11次復牌，但都唔成功，連帶小股東利益要一併賠上。之不過，同之前幾次活動一樣，只得3名大凌蟹民「踴躍」訴苦，其他貌似「內地同胞」嘅小股東繼續保持緘默，專注食嘢。
韋思齊曉以大義
今次關注組打鑼打鼓，終獲港交所接見。關注組秘書趙澤民喺會上話，小股東唔理亦唔想知港交所同大凌喺企業管治嘅爭拗，淨係想知幾時復牌。點知港交所上市科主管韋思齊就義正嚴詞話，大凌犯咗嚴重嘅紀律失當行為，必須披露更多企業管治措施先有望復牌，但大凌董事會冇積極回應，港交所維持停牌嘅決定，其實係要保障𠵱家同未來小股東嘅利益。佢又話，港交所上周五出嘅公告，已經講得好清楚復牌條件，大凌可以成立獨立管治委員會減低當局疑慮，小股東亦可以要求董事會「做番啲嘢」。