幻海奇情 - Elaine

幻海奇情 - Elaine

新相識的朋友聽到我是空姐,總會說:「你就好啦,可以免費旅行四圍飛,一定眼界大開。」眼界大開是必然的,而且用不着下飛機,單是一次十小時的航程,已經較幻海奇情更離奇。
◎「小姐,我要睇香港報紙。」「你等等吖,我搵俾你。如果有嘅,我陣間拎俾你呀。」「我唔理,你宜家去頭等攞俾我。」「太太,我哋架機冇頭等㗎。」
◎「你幫我搬件行李上去呀。」(嘩!件行李係我頭胸腹加埋咁大件)「小姐,唔好意思呀,根據公司policy,係唔鼓勵我哋幫乘客搬行李㗎,如果太重你搬唔起,不如我幫你將件行李checkin啦。」「我唔想checkin,你幫我搬。」「小姐,咁你問吓其他男乘客幫唔幫你啦。」
◎「婆婆,有炒蛋同炒麵,你想食邊樣呀?」「我慣咗早餐食飯。」「唔好意思,呢餐真係冇呀。」「咁算啦,你俾D糕點我啦。」「吓?」第二餐,「婆婆,呢餐有飯呀。」「我慣咗午餐食麵。」「上嗰餐就有,杯麵你要唔要?」
◎「哦‥‥‥先生你唔食得豬肉,咁等我望望menu睇吓炒蛋有冇豬肉配料先。」鄰座師奶搭嘴,「煙肉即係豬囉,你識唔識字㗎?」
◎「先生要牛肉飯定魚配薯仔呀?」「魚。」「想飲D咩呢?」「酒。」「紅酒、白酒定係啤酒?」「我都揀咗魚囉,你仲要問?」