同為Suzuki門生，我師兄維他奶（Vitara）個朵威震四驅界！我Jimny仔身為師弟，憑藉細c.c.好扭力，一招「猛虎爬山」都叫薄有名聲，無丟家族嘅架。沉默多年，大家以為我退隱江湖，查實我養精蓄銳，換個賣相再Update吓自己，家陣正準備重出江湖，將對手趕離場！
記者：徐影龍
攝影：梁細權
Model：Mattherw
97年我喺東京車展初現光芒，小巧的骰令人留下深刻印象，越野車唔一定粗獷豪邁嘅。多年來我維持原貌，只是我念舊，不願意放下大家都喜歡嘅打扮，可惜事隔11年，彷彿開始被人遺忘，以為我不思進取，正所謂十年一世代，係時候重新裝備自己，喚醒世人「爬山虎」並非浪得虛名！
首先我重點改裝頭部，在今時今日看來有點儍氣嘅舊有頭唇，換上更有現代感嘅氣霸，內裏更改為網狀欄柵，令車首更有動感，亦可增加更多入風位。當然，我Jimny仔始終係Jimny仔，車首上方嘅五間式鬼面罩及頭燈，依然無大變動，車身兩側更近乎一樣，讓大家對我有新鮮感之餘，亦自然聯想起多年熟絡嘅面孔。
可選四驅 到處任行
我天生神力，就算車細c.c.細，一樣咁好扭力，尤其係我享負盛名嘅4WD系統，一般平路OnRoad可能你會嫌我唔夠快，唔係咁易飆到百幾km/h，不過一按4WD模式，就可轉為普通四輪驅動（4H），在轉向、咬地性及上斜等路段上應付裕如，而且車速低過100km/h都可隨時轉換，叻過好多要停定架車先轉到四驅嘅SUV！我仲有秘密絕技「超級四驅模式」（4L），換上更大齒輪，令扭力倍升，莫講話一般沙石路，就算踩上壆、衝山路等OffRoad，一樣難我唔倒。而我嘅底盤亦非現時私家車可比，採用舊有龍骨陣架，整體剛性強得嚇人，就算一邊車轆輾上大石，車架仍可保持硬淨，不致扭曲，而且懸掛及車架偏高，真係攀山涉水都無問題。
不過以前俾人彈我大食，到08年我換咗副注入VVT技術嘅偈，秏油量即時減低，市區路閒閒哋行到11km/1公升，今時今日咁嘅油價，1,300c.c.呢類車仔，肯定更搶手。
規格
引擎：1,328c.c.直四DOHC
馬力：85hp/6,000rpm
扭力：110Nm/4,100rpm
傳動：4前速自動波，選擇式四驅
查詢：香島汽車（23320091）
大家點睇
唔似1.3車仔（明哥，幾十年駕駛經驗）
「我揸車幾十年，最欣賞Jimny嘅爬山能力，上山表現優秀，我試過揸入元朗牛潭尾走幾轉，鄉下路高高低低又多石，操控一樣咁靈活，一啲都唔似1.3車仔。」
咪要求速度（老龍，車版編輯）
「老實講，要舒服要速度唔會揀Jimny，但其OffRoad表現實在不俗，試過好粗魯咁上上落落行人路幾次，都唔覺吃力或車身扭曲，可惜落雨試唔到太多，等遲啲棍波版到港必定要狠試山路一次。」
