五月二日，匆匆忙忙睇完鬼佬Ｒ反對標籤法嘅電郵，立即飛車入沙田馬場睇奧運火炬傳遞，去馬場而唔去FCC聽米亞花露，畀陶傑話冇國際視野，不過左丁山人在江湖，有時無法子學陶傑咁灑脫咯！當時的士司機聽到話要過海，面色一沉，因為市區交通已經塞得要死也。左丁山叫佢：「西隧過海，經八號幹線去沙田，行過未？」司機咭一聲笑出嚟，踩油而去，二十分鐘後，已人在馬場；現時由中環去沙田，經西隧及八號幹線，係最快嘅方法，由環球大廈去到沙田馬場，唔會有一盞紅燈，隧道費單程就要四十八元，如果計較時間即是金錢嘅話，冇話唔抵。
八號幹線最大嘅弱點就係過完隧道，行落新城市廣場一段路之頭段，兩線滙合變成一線，如果揸車太快，好容易搞出碰碰車，另外，由沙田往九龍方向，經過偉華中心之後上山入隧道，又是如此。照理成條新路由路政署計劃，點解搞成咁？既危險，又易成樽頸，譬如大貨櫃車在此死火嘅話，成條路就會塞死。路政署班高官究竟識唔識得照顧駕駛者安全㗎？「西貢長命斜」慘劇，前車可鑑噃。的士司機經過此路段，口中猛咁問候路政署！（下刪三十字……）
既然話咁快就到咗馬場，好容易行上三樓舉行茶會嘅地方，立即碰到會長Ｋ與教授Ｗ傾緊他日英國皇孫（安妮公主之女）來港參加奧運馬術賽，安妮公主如果來港捧場嘅話，應該點樣招待，咁高級嘅嘢，左丁山唔敢出聲，等啲大人物傷腦筋可也。跟住遇上董事長Ｓ，佢係左丁山前輩，但對後輩好有禮貌，絕不擺款，好令後輩心悅誠服。左丁山問董事長Ｓ：「聽講陸羽茶室今年慶祝七十年，會唔會有慶祝活動呀？」董事長Ｓ話：「應該係七十五周年紀念，創業日期係農曆五月十九（按：翻查萬年曆後，陸羽開業日期應係一九三三年六月十一日星期日）。現在我個孫都到陸羽飲茶咯。自我祖父計起，我家已有五代到陸羽飲茶！」如此紀錄，難得之至，應該好少有；據董事長Ｓ講，陸羽會出版一本書，講述陸羽歷史，懷舊一番，已有一班文化界、商界朋友幫忙進行緊，左丁山問：「不如董事長你親身見吓傳媒，做大啲啦，畢竟陸羽係香港人之最古老集體回憶吖嗎！」董事長Ｓ一於耍手擰頭，唔肯制。