中文大學三個創校書院之一嘅新亞書院，當年創立初期就係喺深水埗桂林街一幢唐樓落腳，第二屆新亞畢業生、華夏書院創辦人列航飛噚日帶八方同一班行家參觀學校舊址。往日錢穆同唐君毅上堂教學嘅單位，𠵱家已經變成板間房租畀貧窮戶；當年幾位國學大師周不時耍吓太極嘅天台，𠵱家已經變成頹垣敗瓦，企喺度都怕怕。
除咗新亞舊址，喺區內經營圖畫裝裱嘅「一平鋁質相架」都好有特色，老闆孫景燊話，30年嚟名畫家王無邪同陳球安都係佢客仔，認真巴閉。新亞書院將聯同社協，喺7月中至8月搞個「西九樓計色」展覽，展出歷史圖片同資料，包括錢穆填詞嘅新亞校歌手稿真迹。又會帶市民參觀新亞書院舊址同埋區內幾幢至少50年歷史嘅唐樓，講解區內嘅生活文化。政府拆得就拆，舊嘢唔睇好快冇，呢類展覽八方梗支持。