無綫推出全新飲食節目《蔡瀾歎名菜》，噚日主持蔡瀾、蘇玉華同AmandaS.聯同嘉賓倪匡到中環鏞記酒家錄影。美食當前，蔡瀾當然搵埋好友倪匡分享，佢仲話：「佢唔只今集做嘉賓，總之往後一有好嘢食都會拉埋倪匡嚟。」帶挈老友大飽口福，唔怪得倪匡越嚟越發福，佢展露微笑個樣，肥到成尊笑佛咁呀。
節目會以介紹失傳美食為主題，噚日仲展示有關材料包括龍躉皮、黃膠翅同蟛蜞卵等。美女廚神蘇玉華最希望品嚐美食，尤其係傳統雲吞麵，佢仲話：「跟蔡生合作學到好多嘢，唔只飲食文化，因為佢係才子，有時仲會吟首詩出嚟。」蔡瀾就話今次堅持搵蘇玉華做主持，佢話：「蘇玉華係難得對食有深入認識同愛好嘅人，而且佢好有自己見地同主張。」
AmandaS.頻NG
AmandaS.就第一次做節目主持，佢承認半鹹淡廣東話搞到成日NG，不過就笑笑口話：「觀眾最鍾意睇我呢啲馬馬虎虎嘅廣東話。」