近日接連發生嚴重巴士車禍，令多個家庭受盡喪親之痛，兩名司機均被懷疑衝紅燈及超速，因而再度引起巴士司機駕駛態度嘅問題。
仲記得以前好少會聽到涉及巴士嘅嚴重車禍，但近幾年似乎有上升趨勢；好多人都覺得同新型車有更大馬力之餘，亦加咗唔少電子輔助系統，令駕駛者掉以輕心有關，不過最重要都係駕駛者個人心態。
近年發覺一小撮巴士司機覺得大車可以恰細車，因而喺路上經常會見到佢哋逼細車讓佢哋先行嘅情況，更甚嘅喺高速公路上超速駕駛並左穿右插，絕對威脅乘客同其他道路使用者嘅安全！希望各位司機大佬時刻保持心平氣和，免一時之快或一時之氣而發生意外，令無辜嘅人受傷，抱憾終生！
記者：丹尼斯