4周前，只有24分嘅富咸仲排喺英超尾2位置，直到前日，呢班波竟然神奇地暫時脫離降班區域排17位！富咸成績突飛猛進，原來係班主兼Harrods百貨公司老闆阿法耶茲，賽前送咗個「護級孖寶」魚子醬同「偉哥」畀隊員，搞到班波精神晒！
我求大俠早前諗住富咸似足「羊牯」咁，睇怕都會俾打比郡呢隻「羊頭」拖落英冠。嘩！點知富咸近4場贏3場攞足9分，上周六迎戰主要護級對手伯明翰，都靠麥比廸同尼維蘭嘅入球淨勝2:0，𠵱家升上安全線嘅17位，你哋都咪話唔神奇。
「偉哥」魚子醬振士氣
呢班波突然咁勁，我求大俠起初都不得其解，唔通領隊鶴臣真係咁堅？最後俾我八到，原來阿法耶茲特登送咗個「護級食品籃」畀班隊員，佢身為大百貨公司老闆，籃內梗係裝住啲店內最貴同最筍嘅魚子醬同「偉哥」。魚子醬係高檔嘢求大俠就食得少，補唔補身真係唔知，不過我都識咩叫「偉哥」囉。
阿法耶茲呢招夠絕喇，佢嘅用意無非都係想帶個訊息畀球員，贏到波護到級嘅話，球員可以食「偉哥」放縱一吓！
結果呢個「護級孖寶」果然有效，家陣富咸暫時脫離降班區域，假如煞科日作客擊敗有英足盃決賽後顧嘅樸茨茅夫，即刻宣佈護級成功。到時莫講話「偉哥」，相信阿法耶茲肯定會攞定啲「吹氣公仔」、「鮑魚」同「手撕雞」畀隊員嘆吓喇啩！
雷丁伯明翰自作孽
富咸呢邊搞得掂，雷丁（18位）同伯明翰（19位）嗰邊就危危乎咯，來季好大機會同隻「羊」降落英冠作賽。其實呢兩隊波又係抵死嘅，伯明翰之前領先紅軍兩球都被迫和；雷丁就仲衰自己玩內訌，領隊郭甫將幾個A隊成員調落預備組踢，搞到班波冇晒士氣，真係後悔都嚟唔切㗎喇！
