香港人鍾意食海鮮，喺酒家食到唔停口，但喺屋企煮鮮味梗係差咁一大截。好似炒海蝦，就算有扎扎跳新鮮貨色，炒出來始終唔夠肉嫩殼脆，怪師傅就醒大家至鮮貼士：「只要先爆一爆蝦身再去煎，皮會更脆，咬落爽到嗦嗦聲。」
記者：林佩婷
攝影：伍慶泉
示範：怪師傅烹飪工作坊負責人怪師傅（http://www.masterwhy.com/）
怪師傅
從事飲食事業35年，由於做事方式及性格古怪，故被人叫做怪師傅。最拿手煮山東豬扒及黃金蝦。
魚露煎海蝦
需時：20分鐘
份量：4人
想容易挑走蝦腸，最好於蝦身尾二節去做，這個位置起腸會較容易。
材料
海蝦6両、生粉2湯匙、胡椒粉少許
汁料：魚露2茶匙、糖1/2茶匙、水100毫升、紹酒1茶匙
做法
1.海蝦洗淨，撲上生粉及胡椒粉。
2.開中火將海蝦略為泡油後取出，瀝去多餘油份。
3.開中火下海蝦，再下汁料煮至收亁水份後熄火上碟。
Alan：點睇海蝦新唔新鮮呢？
答：最好揀一些蝦頭、頸同腳唔好現黑點。如果有黑點或眼睛開始發白，即表示不新鮮，最好唔好買。
薑葱炒肉蟹
需時：30分鐘
份量：2人
買生蟹的話，記得用冰水浸死或用筷子拮死才去煮，否則生蟹放鑊遇熱會甩手甩腳，影響賣相。
材料
肉蟹約1斤、葱段/薑絲各1両、蒜茸1茶匙、紹酒1湯匙、生粉2茶匙、胡椒粉/油各適量
汁料：生抽2茶匙、蠔油/糖各1茶匙、胡椒粉少許、水150毫升、生粉水適量
做法
1.肉蟹洗淨切件，撲上生粉及胡椒粉。
2.開大火將蟹件泡油後瀝亁多餘油份。
3.開中火，先下葱段及薑絲爆香、再下蒜茸及蟹件略炒。
4.再下紹酒及汁料煮至收亁水份後熄火上碟。
馮太：買返來的蟹仲係活生生，點解到煮嘅時候就甩手甩腳？
答：因為蟹未死，到煮時蟹一遇熱就會甩抓，所以煮前要用水浸死隻蟹。
冬菜蒸九肚魚
需時：30分鐘
份量：5人
洗冬菜好像洗極都唔亁淨，最好其實先浸軟它才去洗，這樣裏面的沙才易冲走。
材料
九肚魚4條、粉絲適量、冬菜3湯匙、生蒜茸1/2茶匙、熟蒜茸1湯匙、薑茸1茶匙、葱花1湯匙
調味：生抽2茶匙、糖1茶匙、紹酒1茶匙、生粉1茶匙、胡椒粉少許、麻油少許
做法
1.粉絲浸軟，置碟底。九肚魚洗淨劏好後放於粉絲上。
2.冬菜洗淨切幼，下其餘配料及調味淋在九肚魚上。
3.水滾後大火蒸約12分鐘，取出後灑上葱花裝飾。
Lily：點睇九肚魚係靚定唔靚呢？
答：魚身最好白雪雪，同埋唔好有紅點就靚啦！
粟米蘆笋蟹肉羮
需時：30分鐘
份量：4人
用蘆笋去煮湯羮，最好先削去較老的外皮，這樣吃的時候便不覺有渣。
材料
蘆笋2両、急凍蟹肉3湯匙、蛋白1隻、粟米茸1罐、水800毫升
調味：鹽適量、胡椒粉少許、生粉水適量
做法
1.蘆笋去皮後切粒，與蟹肉一起汆水備用。
2.粟米茸加水後大火煮滾，待煮滾後下適量鹽及胡椒粉調味。
3.再下蟹肉及蘆笋略煮，然後收細火下適量生粉水稠身。
4.熄火後迅速加入蛋白，拌勻成蛋花即成。
Cindy：我見過罐頭蟹肉，其實用來代替急凍蟹肉得唔得？
答：罐頭蟹肉肉質比較散，亦已經調咗味，我唔建議用。
網上重溫
http://cooking.appledaily.com