王喜早前跟無綫攝製隊去內地嘅珠穆朗瑪峯採訪奧運聖火傳送，點知佢又會咁唔好彩，首先係佢出現咗高山反應，之後工作人員諗住送佢去醫院途中又發生意外跌咗落河，搞到胸肺受傷，醫生檢查之後要佢放棄上山，留院治療。鑑於佢嘅傷勢唔適宜再留喺嗰度，王喜決定返香港休養，噚晚7點佢單人匹馬搭飛機返咗嚟，無綫連派人接機都冇。
滿面鬚根嘅王喜用手推車推住兩大件行李出機場，佢只係得好朋友Kawaii去接機。王喜精神睇嚟雖然唔錯，但係行起路上嚟就好似好辛苦咁，王喜話：「落機後，我會先去法國醫院做個身體檢查，𠵱家我嘅背脊同心口仲係好痛，呢幾日痛到我冇覺好瞓！今次意外，我真係有兩次同死神握手嘅感覺，𠵱家能夠冇事，可以返嚟見到大家，真係好開心。」
刻意淡化病情
有過呢次企喺死亡邊緣嘅經歷，王喜話：「以後我會對身邊人更加珍惜，喺我出事嘅時候，為免屋企人擔心，我都有打過電話畀佢哋，我將病情刻意淡化咗，而公司同事都有不斷打嚟問候我，關心我，返嚟之後，我諗住先要靜心休養一輪，因為18號就要開《烈火雄心3》，我都未知到時可唔可以開到工，如果未得，希望公司識做啦！」
至於王喜喺醫院入咗診療房接受醫生檢查嘅時候，有兩個喇嘛跟住入埋去，仲喺房裏面逗留咗15分鐘㖭。