任賢齊前晚在紅館舉行個唱，適逢其女兒Rati三歲生日，在台上的小齊心繫妻女，不時提及老婆及女兒，當Rati突然上台獻花，幸福老竇小齊忍不住親吻愛女，台下歌迷受溫馨氣氛感染，即席唱生日歌道賀。
任賢齊在紅館舉行一連兩場的「LOVE&BELOVED任賢齊演唱會2008」前晚開鑼，他的太太Tina和女兒Rati都在台下打氣，一家人台上台下大晒溫情，幸福滿瀉。小齊前晚表演時，一直將老婆與女兒記掛在心，當他唱至《你是我的老婆》時，不停追問：「我老婆喺邊？老婆老婆！」現場觀眾不停自認是小齊老婆，讓他笑逐顏開。
「做父母好辛苦」
後來小齊唱《外婆橋》時說：「呢首歌我好少唱，我想唱畀你哋聽，呢首歌係我個女喺BB時，我唱畀佢聽㗎。」小齊一邊唱，現場螢幕即播出他與兒女的生活照。
適逢前日是Rati三歲生日，小齊特地在台上說：「我要同我個女講生日快樂，佢今日生日，唔知個女聽唔聽到？」台下觀眾即指着Rati，小齊看到後說：「爹哋好忙，有咁多人聽我唱歌，做父母好辛苦。」小齊心繫妻兒，Rati也十分識做，在小齊唱歌中途，忽然拿着大花走到台上，在小齊背後篤他一下，小齊向後一望，驚見女兒上了台，然後向觀眾笑說：「吓，Rati，呢個我個女呀，呢度好多機關㗎，要小心啲。」
小齊親吻女兒一下，又拖着她唱歌，此時台下歌迷也特地唱生日歌，又送禮物給Rati，小齊開心代收，並說：「唔好意思，我屋企嘅嘢阻住你哋。」沒說半句話的Rati開始害羞地縮在爸爸身後，又緊緊攬着他，十分可愛。
跳鬥牛舞頭暈
小齊前晚除落力獻唱，也排了多款舞蹈，當他戴上爆炸頭假髮跳70年代舞步時，惹得全場捧腹，後來他又穿西班牙服大跳鬥牛舞，搖頭擺腦狀甚辛苦，他笑說：「好易頭暈！」
採訪：胡比 攝影：陳偉權
小八卦：灑下男兒淚
小齊前晚開騷時玩「小齊說」遊戲，叫全場觀眾拿出大會送贈的桃紅色心形卡紙，聽他指示向左或向右擺動，場面壯觀。小齊唱至《有夢的人》時忍不住當眾灑下男兒淚（圖），他哽咽說：「Sorry，有啲哭泣，多謝大家支持，我已經五次喺紅館開騷，多謝你哋畀機會我，喺紅館唱歌係我嘅夢想，男兒有淚不輕彈，唔好喊啦！」
收花變撒尿
小齊今次個唱設三面台，故歌迷送花要經過保安，前晚一位歌迷千辛萬苦捧着一大束鮮花送給偶像，小齊接過花後顧着說多謝，卻將花束垂下，內裏的水傾瀉而出，形成一條水柱，當他發現後笑說：「唔好意思，我今晚飲得太多水。」惹得全場大笑。
