隔牆有耳：有靚女好辦事 - 李八方

民主黨早前拍咗套向多年來支持民主嘅市民致敬嘅MV後，噚日又搞番場音樂會，搵嚟電台DJ快咇同一班美少女一齊又唱又跳，無非係想叫啲年輕人登記做選民。一向搞笑嘅快咇，噚日就喺活動上送咗個叫Iris嘅美少女畀民主黨元老馬丁同華叔，話要獻出第一次畀民主黨，大家咪諗錯隔籬，佢嘅意思係第一次登記做選民。呢位美少女之後同有民主黨劉華之稱嘅林子健即場獻唱MV首歌。講起套MV，有份做女主角嘅Iris就話，咪睇MV裏面班白鴿咁聽話，其實為咗拍呢套白鴿黨MV，已經放生咗廿幾三十隻白鴿。