公司上巿都希望有個靚冧巴，有啲公司會捐100萬去公益金，揀個心水號碼，但求唔旺股價都旺間公司，再唔係旺吓揸fit人都好！不過，8年前私有化，8年後捲土重來再上市嘅華光海運（067），似乎唔多介意冧巴靚唔靚，用咗前上海首富周正毅間上海地產個舊冧巴─67，唔怕唔老利。
首先，67呢個冧巴本身就冇乜特別，加上前上海首富周正毅用過，咁個冧巴有幾「旺」大家都諗到，周正毅由登入《福布斯》中國富豪榜，凳未坐暖就做咗階下囚，連老婆毛玉萍都同一命運。而上海地產喺03年，因主席涉嫌操縱證券交易、虛報註冊資本被調查而停牌，到05年先被清盤。
趙世光持有華光海運，而其實趙氏家族都經歷唔少，已故一代船王趙從衍創辦華光航運，趙老先生係香港四大船王之一，但早年在港上市嘅華光控股面臨過財務危機，後人亦曾為爭家產而對簿公堂。咁既然都見慣風浪，仲有乜嘢好怕吖。