今日係五月四日，五四運動八十九周年紀念日，明年係五四運動九十周年，唔知北京會唔會大搞紀念活動呢？呢排中國大陸及香港愛國商人興搞愛國主義，如果熱情能維持下去，明年搞五四就最啱，講近代學生愛國運動，當以五四為開端，共產黨亦因此而孕育。飲水思源；中共應該重視五四，全國學生應該重視五四，北京大學尤其應該站在前列。
之不過，政治現實與愛國情緒有抵觸㗎。自發性愛國運動一定受到排擠，有黨中央撐腰嘅愛國運動先至可以維持五分鐘。最近嘅例子係全國城市市民學生反家樂福，但中央一聲：「玩夠嘞」，報紙報導內地互聯網上再無「家樂福」字眼嘅網頁，好激嗰啲網民唯有自己激氣可也。
中國留美學生話平時忍受夠嘞，不忿外國傳媒偏袒西藏，於是（據IHT報導）南加州大學啲中國留學生踴躍出席一位西藏喇嘛嘅演講會，嚴詞質詢，甚至向喇嘛掟水樽，以表示不滿。留美學生罵西方，罵西方傳媒，當然可以，在美國有充份自由，不過佢哋有冇反省到點解西方記者係咁死硬唔聽佢哋講呢？主要原因就係西方記者認為中國學生，即使到咗西方，仍然無言論自由，言不由衷，只係背誦中國政府嘅官方言論。
事實是否如此？可以做一個實驗嘅。靈感來自冷戰時期一個笑話。美國遊客對蘇聯人講：「我哋有在華盛頓大聲責罵白宮主人嘅自由。」蘇聯人反駁：「有乜咁巴閉啫，我哋也有在莫斯科紅場集會，大聲責罵美國總統嘅自由！」嗱，啲留美中國學生在美國大罵CNN，大罵法國之後，返到北京要得到事先批准先至可以在天安門集會大聲鬧法國，鬧CNN，但真正考驗係，中國學生可唔可以自發性在天安門集會，大聲罵中國貪官腐敗呢？六四就係前車之鑑。既然如此，西方記者總係對中國留學生嘅愛國言論抱懷疑態度，即使係偏見，一時之間亦難以扭轉，香港係中國城市中言論自由最多嘅，可嘆者乃係城中有好多擦鞋太急嘅太監，自己設限，非常自律，呢類人當權當道，會害死香港。