繼股神畢菲特、商品大王羅杰斯之後，美國聯儲局前主席格林斯潘，亦「捐出」時間作慈善拍賣，價高者可以帶多三個人，同格老以及佢位夫人─資深傳媒人Andrea，一齊喺華盛頓嘅四季酒店嘆個下午茶，聽落都吸引。尤其美國次按問題，有人歸咎於格林斯潘，話係格老留低嘅手尾，若然華華有機會同格老伉儷hightea，華華都想問吓佢點睇美國次按，更重要嘅梗係想問吓，咁嘅形勢有乜投資貼士啦。
同格老tea嘅競投今個月3號開始咗，後日（7號，星期三）截止，家陣仲有兩日，有興趣嘅可以到 http://www.charitybuzz.com試吓，呢個慈善拍賣網係美國一個公益團體搞嘅，拉攏咗好多名人「捐出」時間拍賣，同格老tea只係其中之一，噚日截稿前華華見共有四次出價，叫價去到1.6萬美金，即係12.5萬港銀左右。
有排未追上股神
就呢個價嚟講唔算貴，上年格老都有參加呢個活動，結果籌得4.5萬美金（35萬港銀），不過咁，通常拍賣呢家嘢，最後一刻先係大家衝刺嘅時候，話唔定個價會急升好多。
之不過，華華覺得點升都未必追得上同股神畢菲特。07年同股神食餐晏，要65.01萬美元（約507萬港元），由加州一名基金經理投得，佢哋去咗紐約一家牛排餐廳鋸扒；06年就有步步高創辦人段永平投得，用62萬美金（約483萬港紙）贏到同股神畢菲特食晏，呢兩年個價加咗25%。
電郵：mailto:[email protected]