唔記得邊個偉人教過我，世界上冇免費午餐！不過親近政府Building人士，呢排就頻頻開餐！講緊係香港政府Wi-Fi通，自上年中開通試用，好多人發現住喺隔籬真係唔使申請寬頻都可以免費上網！睇嚟買樓除咗要近地鐵、樓下有商場，最好仲有埋Wi-Fi通喺左近，唔使問玲玲都知，呢啲咪家山有福囉！
全港暫有55個Wi-Fi通
香港政府正計劃喺未來兩年內，逐步喺350個政府場地，免費提供Wi-Fi無線上網設施，呢啲地方主要包括公共圖書館、諮詢服務中心、體育中心、文化康樂中心、大型公園同政府大樓等。而截至現時為止，政府共開通咗55個Hotspot點，去到想試玩，咁就要留意以下StepbyStep。
Step1
先開啓電腦Wi-Fi，然後揀選freegovwifi，然後連線。
Step2
開啓《IE》就會進入使用守則及免責聲明，睇完按同意。
Step3
最後會跳出呢個畫面，除可以Link上政府網頁，亦可自入網址喇！
實地測試：免費Wi-Fi工時開放
住低層快過「有線」
Wi-Fi通地點：荃灣公共圖書館
「菠蘿雞」民居：荃錦中心
Kathy同阿Cat有個唔願出鏡嘅老死──小張，住正荃灣公共圖書館毗鄰嘅荃錦中心，某日剛買下一部Notebook，一開機竟然自己Search到有無線網絡！「可能荃錦平台對住就係圖書館，加埋我住喺10樓以下低層，收到政府Wi-Fi訊號差唔多有3/5格咁強！原本諗住都想買個WirelessRouter，𠵱家可以慳番㖭。」
雖則話有免費Wi-Fi任用，不過其實有時段限制：基本上每日開放時間係辦公時間上午10點至晚上6、7點左右，大致緊貼圖書館開放時間。「其實我都有部Desktop插LAN玩上網，𠵱家可以話多個選擇。」公眾開放嘢，記者問係咪好慢啦？「咁又唔係喎！可能政府條線頻寬好大，又或者到今日都唔係好多人知點玩，感覺仲爽過我用開嘅『有線』寬頻喎！」
70米外照樣上網
Wi-Fi通地點：沙田民政事務處諮詢服務中心
「菠蘿雞」民居：排頭村
就實地測試，70米外嘅排頭村，起初收到Signal有5/5全爆紀錄。不過一正式登記上網，馬上跌到2/5，叫做馬馬虎虎上到網啦！另外發現背靠的寶福山位置，唔知點解隔條馬路、約10米距離就已經上唔到網，明顯係「背向」發射站嘅盲點情況。
勁Lag好難上
Wi-Fi通地點：新蒲崗公共圖書館
「菠蘿雞」民居：富崇樓
與新蒲崗圖書館一條馬路之隔，氹氹圍住都係舊唐樓，經實地測試係完全冇死角，周圍民居都收到政府嘅免費Wi-Fi。不過試用上網時，感覺係速度超慢，曾試用10分鐘開一個網頁，最後係死咗喺度冇動靜，估計可能「使用率」幾高吓！
查詢現已開通香港政府Wi-Fi地點： http://www.gov.hk/tc/theme/wifi/location/result.htm?id=all&type=all