星期六睇報紙見到個訃聞，原來六福集團（590）名譽董事長黃桂生喺上個月23號騎鶴西去，訃聞見報嘅翌日，即係噚日，喺紅磡世界殯儀館設靈，今日大殮，遺體將會運返深圳大鵬灣華僑永遠墓園安葬。
黃老先生享壽103歲，兒孫滿堂，係笑喪。黃老先生係珠寶業老行尊，早年經營桂記祥珠寶金行，可以講得上係六福嘅前身。
黃老先生個仔、六福行政總裁黃偉常曾經接受訪問，憶述當年小型金行經營困難，除咗入貨價高，可以揀嘅款亦唔多，所以客路隨之流失。亦因為咁，所以黃偉常體會到一個人嘅力量其實好有限，所以諗到集資嘅需要，結果集合好友行家資本後，喺97年上市。
至於六福嘅名，黃偉常話靈感係嚟自經典電視劇《狂潮》，據聞劇裏面有個經營金行嘅家族，金行名唔記得叫玉福定六福，由於佢當時想改一個比桂記祥更易記同動聽嘅名，所以揀咗六福。