九洲發展（908）業績實淨，兼有奧運及注資概念，窗口公司當中，九洲最低殘，現價絕對超值。九洲係珠海市窗口公司，1年以嚟累跌43%，現價（0.62元）仲喺1年低位上落。紅色窗口股中，上實（363）最勁，同期升咗近63%，又連唔點起眼嘅佛山窗口榮山（570），同期都升咗20%。九展殘得交關！
又九展PE得8倍幾，P/B0.57倍，同類旅遊景點股中旅（308），P/B貼近兩倍，PE上到30倍。要咁睇，北京奧運盛事，九展亦理應受惠，集團08年度純利，係咁意增長20%到9500萬銀，PE得番7倍幾，睇數據，直情流口水。再講，九洲貴為珠海市窗口公司，獲栽培係遲早嘅事，而九展家陣市值得6.9億銀，怕且食唔起頗大型項目，斷估有注資，九展市值唔係呢個水位。買九展，博翻半番見0.93元，到時，集團預期PE都係得10倍多少少，仲係好平。
川河落後博升25%
川河（281）07年度（12月底止）售樓大豐收，純利增長咗40%到2.2億銀，PE講緊得4倍。連售樓套現回籠，集團去年底嘅手頭現金，急增到6.4億銀，每股淨現金高達0.245元，係現價（0.35元）70%。川河食住升浪售樓套現，銀彈充足，又可以再藉宏調搵超筍項目，迎接下一潮大浪，管理層眼光獨到。炒落後內房股，冷吼川河，博上返250日線0.44元，川河要升25%，而目標價仲喺NAV0.53元樓下，好安全。