高達可謂動漫經典中嘅經典，名場面如馬沙同阿寶太空格劍、嘉美尤監生撞瓜斯洛哥，Fans至今仍歷歷在目。NDS新作《EmblemofGundam》，咪睇佢畫面一般，佢嘅野心係要玩家親身重演每場經典戰役場面，仲畀埋動畫版嘅畫面你睇，忠實程度連《傑尼之野望》都唔係佢嗰皮！
文：陳福榮
《Z高達》兩大結局任揀
同以往嘅Q版戰棋好唔同，雖然《EmblemofGundam》喺戰場版圖都係用幾可愛嘅畫面嚟演繹，但實際上佢係非常認真嘅講古仔遊戲；好多遊戲場面，都係跟足電視同電影版原著發展嚟做，認真程度絕對攞滿分。
本作品囊括咗頭5套高達嘅故事，分別有阿寶對馬沙嘅0079初代高達、之後果兩套OVA《口袋裏的戰爭》和《08小隊》、出完OVA後直頭再拍成電影嘅《0083星塵回憶》以及Fans鍾愛程度不比初代時遜色嘅《Z高達》。其中尤以《Z高達》最為特別，因為之前佢重新製作過內容稍作調整嘅三套電影版，令到最尾劇情發展有所不同，因此玩家喺《Emblem》可以自行選擇究竟想重演邊個結果，都算係與時並進嘅設計。
調兵遣將似《GGen》
基於開發宗旨係講到明完全忠於原著，要俾玩家透過遊戲再次感受每段劇情嘅精采之處，因此絕對唔會發生喺《GGen》或者《傑尼之野望》呢兩隻模擬遊戲入面嘅「IF情節」（例如馬沙開發滿身赤紅嘅格斯巴高達，喺《Emblem》就唔會出現。），如果想自創劇情大家可以慳番啖氣。不過系統上佢其實係有參照剛才所提到兩作嘅特色，尤其係戰場版圖部隊移動時，需要顧及敵軍企位同面對方向等，並唔係求祈擺隻棋喺度、單靠屈Level就可以從容過關，點都要認真諗吓每步棋要點行。
組合配搭自由度大
儘管講到對原著故事認真成咁，打起上嚟又唔係毫無變化咁齋，始終打機都係想有樂趣，下下跟到咁足就會無晒彈性。除咗必然嘅角色同機體外，遊戲係容許你自由編製原創部隊組合上陣，即使戰役中未有同場合作嘅機師都無問題，只要利用過版時取得嘅獎分買人、買機，就可以整啲幾特別但其實唔會喺果場仗現身嘅隊伍，算係無自由得嚟有番些少原創性。
另外，雖然隻Game一定要跟足劇情發展嚟玩，但其實喺進入戰鬥之前，係設有名為Baton嘅分線發展系統，任你選擇到底睇邊一方面嘅立場，甚至會影響到跟住玩邊關，換句話說又係逼人玩多次嘅設計啦！
名場面一覽無遺
自稱「劇場式模擬遊戲」類型嘅本作，當然係以重演昔日每個不朽場面作為最大目的，因此除咗透過戰爭狀況呈現番各著名戰役嘅發展，更重要係連機械人嘅動作都跟番原版嚟做，咁玩家先會有更佳代入感。唔計一般雜卒成群蜂擁而出嘅畫面，其實各主角級機體如元祖高達等都會依番動畫嚟整啲攻擊，雖然有人大彈咁渣就無謂夾硬用3D畫啦，不過睇真啲其實並唔係即時運算多邊形，而係事前畫好嘅播片式假3D，以NDS嚟講真係收晒貨有突㗎喇。
Replay名場面
機種：NDS
廠商：NamcoBandai
類型：SLG
人數：1人
日期：發售中
價格：$320