特區政府親疏有別，高官「老馮」挺保皇黨，所以噚日環境局局長邱騰華現身公民黨南區支部開幕禮，顯得特別稀奇。正所謂無事不登三寶殿，高官亦唔會無事獻殷勤，邱騰華畀面公民黨，係因為該黨早前對開徵膠袋稅有意見，局長恐防有關草案被否決，功敗垂成，惟有親自出馬拉票。
箍票支持膠袋稅
據八方聽聞，公民黨內部曾討論係咪應該支持開徵膠袋稅，大部份成員認為可以支持，不過擔心政府博大霧，以環保之名，趁機徵收其他塑膠製品稅項，屆時就擾民兼後患無窮，所以該黨仍未決定是否支持法案；除非政府肯承諾，日後開徵膠袋以外其他塑膠製品稅項前，先交立法會討論，咁至會考慮投贊成票。
邱騰華噚日擺明有備而來，搞掂剪綵等繁文縟節後，好詳細咁又再解釋多一次開徵膠袋稅好處，更表示已經花唔少唇舌向各黨派解釋，相信議員冇乜理由反對。八方唔知公民黨聽唔聽得入耳，但相信邱騰華仲有排忙，因為民建聯同自由黨仍未表態，革命尚未成功，局長仍需努力。