MitsuokaOrochi人手打造　大蛇傳說

日本Mitsuoka（光岡）車並非人人識，識得佢嘅都知佢造車有一手，不假手機械，同國際名車Rolls-Royce、Ferrari等一樣，全人手打造，既矜貴亦夠獨特。剛剛推出嘅超級跑車MitsuokaOrochi更以日本傳說作為設計基礎，全身大蛇造型，妖媚搶鏡，而且超跑格局但就適合城市行走，飆出新一代大蛇傳說。

記者：梁美甜
攝影：王文忠
模特兒：Enrica

蛇眼妖媚

大蛇之所以被稱為新一代日本超級跑車主要係因為佢夠勁。勁在全車以人手打造、勁在以日本傳說「八岐之大蛇」為設計概念、勁在超跑形態游走市區囉！
第一眼見到大蛇，最震撼莫過於嗰對頭燈，大大個呈橢圓形，加上中間明顯畫有一條黑線，形同蛇眼，可以想像到晚間游走時散發出嘅妖媚有幾勁！光岡不嬲都以手造仿古車聞名，大蛇雖非仿古車，但依然全人手打造，車身以玻璃纖維以及樹膠製成，內櫳則以真皮、鋁等做配搭。大蛇年產量只有50部，生產商更揚言只產400部。據代理講，現時定單都已經排到出年喇，都咪話唔誇張。

城市超跑

早排周杰倫借來幽靈之子超跑拍MV，當時佢話部車喺香港用嘥咗！周董指嘅嘥並非香港人唔識駕馭呢部名車，只係香港街道短兼多燈，根本就發揮唔到跑車性能罷了。喺呢方面，大蛇就攞晒分嘞，首先，佢外形夠晒獨特，由我揸出街一刻起，超過二十幾部車喺旁邊慢駛、十個人以上走來打探。靚唔靚仔、討唔討人歡心就見仁見智，不過佢嘅實力同超跑就有段距離，佢配搭嘅係Toyota3.3V6引擎，馬力233匹，而最高時速每小時240公里。問題係由於生產商鎖定大蛇係一部可以喺城市入面跑嘅跑車，於是將佢嘅速度鎖定喺每小時180公里之內，亦因為咁，要飆就梗係同好多揸過Ferrari、Porsche、BMW等等辣跑冇得比啦！但換個角度，喺香港、東京、台北等等大城市，揸大蛇就一啲都唔嘥，仲可以好好發揮車嘅性能㖭！