舉起雪山獅子旗示威嘅港大女生陳巧文，係奧運聖火以外近日全城焦點之一，好多人同八方一樣，擔心佢因此慘遭憤青蹂躪。時下好多後生仔只顧打機不問世事，好似陳巧文咁不向強權屈服十分罕有，佢唔止對大是大非堅持己見，網上近日流出佢多幅相片，令人睇到佢我行我素另一面。
據八方粗略統計，網上流傳陳巧文私生活相片大約有40幾張。佢平日愛着tubetop，從呢批相睇到，佢亦十分鍾意着比堅尼，曬得一身令人羨慕嘅古銅色，部份相片係同朋友合照，陳巧文應該幾受朋友歡迎，同男仔、女仔都玩得埋，有啲仲有親熱舉動。
被網友「起底」攻擊
網友對陳巧文新相流出反應好大，有人根據相片顯示嘅腰部紋身，認出佢就係近日網上熱傳嘅「赤腳電車貞子」相中人！網友好快就將佢「起底」，原來佢兩年前曾做過港台節目《TeenPower》嘅WebJ，有份主持節目《盛莊天下》，港台網頁都有佢嘅相；亦做過兼職模特兒，模特兒公司網頁更有佢三圍數字資料。
就西藏問題勇於面對鏡頭嘅陳巧文，對呢批相喺互聯網流傳顯得冇咁大方。佢同八方講，相片原本擺喺facebook內，只可以畀朋友瀏覽，無故流出令佢費解，懷疑佢個facebookaccount有問題而出事，稍後會向facebook查問。私相簿俾人大公開，陳巧文話有啲唔開心，因為冇諗過會因為關注西藏人權問題而俾人「起底」，對佢啲朋友亦唔公平。
回應：唔怕俾人抹黑
佢坦言以前做過港台節目同模特兒，至於有冇興趣入娛樂圈，佢冇回應，強調私人生活同政治立場無關，「我三圍數字同西藏問題有乜關係？」佢透露父親都收到啲相，父母因此唔係幾高興，不過佢話唔怕俾人借題發揮抹黑，「我又冇做過啲唔見得光嘅嘢，行得正企得正，我唔覺有乜嘢痛腳會俾人揸住！」前日示威時，陳巧文遭警察粗暴對待，佢話同律師傾完再決定係咪投訴，至於會唔會再舉起雪山獅子旗示威，遲啲先算。
mailto:[email protected]