一個「鼠王芬」外號令佢知名度提升，身兼西九新動力主席嘅梁美芬應該好開心，因為一講老鼠就諗起佢。唔知係咪見呢條鼠路已經成熟，又或者啲老鼠已經嚇到走晒，九西冇晒老鼠好捉，鼠王芬都開始轉型，佢最新高度關注嘅係西九龍海濱長廊建議。
鼠王芬噚日特別帶同三位專家以及幾十名西九新動力成員出海，實地視察長達23公里嘅西九龍海濱長廊可以點搞。鼠王芬話已經約見發展局局長林鄭月娥傾佢哋嘅西九大計，仲印咗成5萬份打造西九規劃嘅大綱周街派，強調九西選區需要一個「有幹勁」嘅人出嚟服務，hardsell自己，睇嚟轉型做西九芬嘅決心好大，但八方都係覺得鼠王芬呢個名聽落親切啲。