旅發局前總幹事臧明華俾立法會帳委會「特別譴責」，議員更要求當局向佢追數，旅發局主席田少噚日卻喺電台公開表示，搵唔到臧明華，暫時未能向佢收數。
八方朋友聽到呢個消息，即時報料，指前日下午，喺中環往金鐘港鐵列車上見到臧明華，相信臧明華冇「着草」。據朋友形容，當時臧明華同一名男子同行，兩人喺金鐘站落車。見到有市民好似認得佢，臧明華即時耷低頭，顯得好避忌咁樣。
八方唔知點解旅發局接觸唔到臧明華，田少話追10幾萬數，出律師信可能得不償失，搵收數公司都要花錢，為咗攞番庫房應得嘅公帑，各位市民如果喺街上見到臧明華，不妨提醒佢快啲搞掂條數。