沙田居民被勸收衫，怕奧運火炬傳送時民居外的內衣褲「映衰」市容。擔心奧運馬術賽時同樣要收衫，一班師奶向民政局長痛陳厲害。誰知曾公一早收到風，做晒跟師奶鬥嘴的準備，師奶未開腔，他搶先發炮：「政府做過晒調查，沙田並非豪宅區，住戶收入只係中下，着唔起乜嘢名牌，晾出外的衣物，唔慌體面。家醜無謂外揚啦，收衫是為了你們這班阿太好，何必自曝其短呢。」
師奶火都扯埋，媽媽聲想用成條村的LV袋兜頭拍扁曾局長，奈何曾公又施以緩兵計，假裝好意說：「雖然衫唔可以外晾，名牌卻可以掛係窗台當眼位置，當做窗櫥。假如是國內名牌更佳，充份表明了沙田市民的愛國熱情，胡溫是不會瞎了看不到的。」師奶瞪大對眼問：國產有名牌咩？擺幾罐午餐肉和豆豉鯪魚係窗口晒命算唔算愛國？曾公明知被窒仍大讚師奶有創意，事實上他老兄除了馬列毛和偉大舵手鄧小平之外，根本唔曉大陸名牌。
師奶乘機發難，叫民政局資助她們奧運期間外出濕洗的開支，或者搵名店贊助，等她們日日有Dior、Gucci和CK底衫褲show俾全世界尤其是CNN和BBC睇，證明曾特首促銷那個亞洲國際都會image是有料到，唔係吹水的。局長覺得idea頗有point，積極考慮撥款。聽聞另一位曾公決定名下的金字牌領帶無限量任借唔可以做，做好沙田呢台整容騷，一定done的。