香港泥頭車司機協會為要求建造商及判頭向司機支付燃油附加費，協助對抗油價高企的壓力，今日起一連七天於早上9時開始在將軍澳堆填區罷駛，預計環保大道一段路會大塞車，附近的上班族相信會大受影響。位於將軍澳工業邨的無綫電視廣播城也首當其衝，由陳錦鴻主演的無綫新劇《老婆大人2》今日中午12時舉行造型記者會，他表示怕塞車，惟有早上9時返公司。
由於香港泥頭車司機協會今日發動全行2,000多輛泥頭車罷工，時間暫定上午9時至傍晚6時，泥頭車將停留在將軍澳堆填區，故相信在這段時間內，環保大道一帶交通必受影響，這條大道是前往將軍澳工業邨的必經之路，無綫電視廣播城也位於此，碰巧新劇《老婆大人2》於今日中午12時舉行造型記者會，藝員返公司的通告則是上午10時，該劇主角陳錦鴻昨在電話中說：「咁大鑊！都冇辦法喎，只有接受，咁我惟有9點前返公司，其實環保大道只得一條路入嚟，有意外就冇路走，最好整多條新路啦。」
盼事件早平息
滕麗名也有份出席試造型，她在電話中說：「我咪要9點前返去？如果係交通癱瘓就接受唔到，如果只封一條行車線比較好，政府應該準備拖車，真係因為咁樣遲到，僱主要體諒員工唔能夠怪責佢哋。我明白司機嘅要求，出聲要求咗冇人理，係要做番啲嘢畀人知嘅，但最好唔好阻住啲交通。」
李詩韻體諒司機說：「今日我都要返公司試造型，司機要有行動先至引起外界人士留意，每個人做事都有原因，我諗警方會開路啩。」
陳豪則說：「咁大鑊呀！真係唔知喎，我要開廠，相信交通一定有影響，希望快啲平息糾紛，而且反映到條路係主要通道，要好好諗辦法紓緩交通，預咗大塞車，大家都係打工仔啫。」鍾嘉欣亦說：「咁大件事，不過今日我一早要外景，好早返公司應該冇受影響。」陳芷菁說：「我下晝兩點要返到公司，我會留意新聞，相信警方會處理，司機罷駛必有原因，但唔好因為自己嘅行為影響到其他人。」
會跟警方聯絡
此外，無綫外事部副總監曾醒明表示相信罷駛行動對無綫有一定影響，劇組外景大部份早上出發，應該能夠避免，無綫會跟警方加緊聯絡，且作出彈性安排，將軍澳地鐵站將會是集合點，出外景的人員不用先返公司，拍廠景的同事則視乎情況而定。他又呼籲環保大道是主要道路，希望政府有關部門能加以正視，以大眾利益為依歸。
採訪：戴彩煥、陳寶明