停寫新作多年嘅金庸查大俠，經過多番請辭之後，終於從浙江大學人文學院院長一職退落嚟，日前正式同大學高層告別，查大俠可謂正式退隱江湖。文壇同江湖都係是非之地，查大俠自從99年5月出任首任浙大人文學院院長以嚟，一直有唔少不利傳聞。
金庸喺前香港新華社副社長張浚生回流杭州，去浙大做黨委書記之後，受禮聘做院長，當時內地有唔少人質疑查大俠嘅學術水平，曾經有內地報章刊登咗篇叫《狗肉也上正席》嘅文章，唔點名話請大俠做呢個職位係場鬧劇。不過查大俠抱住終身學習精神，喺05年10月話自己年事已高兼想去英國劍橋大學進修，向浙大提出請辭，經過校方再三挽留，先至再坐一會。
杭州品嚐極品魚唇
校方幾個月前接受咗查大俠請辭，兼且安排佢出任大學名譽教授。不過，內地網民對大俠引退仲有唔少猜測，有博客撰文話，大俠請辭皆因大學領導人最近要求每位博士生答辯前最少要喺A類刊物發表過一篇學術文章，但查大俠本身都未喺呢類刊物登過文，惟有知難而退喎。八方唔知呢個傳聞有幾真，只知道大學高層前日同查大俠告別，去咗杭州著名嘅山外山菜館品嚐極品魚唇，仲暢飲20年陳年國宴花雕，大俠食得好滿意。