TakeABreak：古董新娘

生活上，事無大小都有要求的，叫腌尖；對重要的事情有要求的，那才是懂得生活。
結婚一世人一次，這才是人生中不得不完美的事情，例如揀婚紗又怎能求其？坊間租婚紗舖頭大把，款式件件差唔多，睇一間同十間都無分別。打聽之下，原來潮人如徐濠縈都流行穿古董婚紗行禮，除保證款式獨一無二，仲有今日幾乎絕迹市面的手工喱士花，極富欣賞收藏價值，甚至可以當投資保值。

記者︰黃家欣
攝影︰梁細權、楊錦文
模特兒︰Joey

1900前製先叫古董

中學死黨Crystal結婚，第一次做姊妹，幫手籌備搞足一個月，婚禮當日忙到一頭煙，攰到好似打仗！不過今次最滿足都係幫Crystal搵到件靚到絕的古董婚紗，一條米白色貼身長裙，領口有粉紅色的手做古董Lace，再襯一頂維多利亞式的公主小帽，拎埋一把古董Lace傘，十足十公主。款式簡簡單單已經好高貴，一入場就令人眼前一亮。其實我帶Crystal上專賣古董衫嘅Tulip都係碰吓運氣，因為老闆娘Stella話︰「古董衫每款都只得一件，而且婚紗都唔係經常見到款靚又保存得完整嘅。」
舖頭內的衫分兩種︰Antique同Vintage，Stella︰「維多利亞時期係1800至1900年，由嗰個時候保存到現在的，就叫古董，Antique。因為有啲客人接受唔到二手衫，所以我哋有仿古衫，即係Vintage。用上古董布料、Lace，再由英國的Designer重新設計全新款式，然後全人手製作。」古董衫買少見少，所以保存得越好就越貴，Vintage裙價錢平啲，但都保留有維多利亞時期的古典味。

■Tulip老闆娘StellaChow指，歐元大幅升值後，她轉移到澳洲及美國入貨。

■《驚天殺局》中，AngelinaJolie亦穿上一襲古董婚紗。

■徐濠縈結婚時都穿古董婚紗，但原來要着成咁結婚，普通人都一樣負擔得起。

穿一身古董裙行婚禮，既獨一無二又叫人難忘。（Lace長裙$13,800、古董Lace帽$1,880、古董Lace傘價錢待定）

買喱士投資

古董衫唔係人人着到，因為維多利亞時期的女人，個個上圍豐滿，條腰就束到幼一幼。Crystal太瘦，Carry唔到公主袖的鬆身上衣，反而由Tulip重新設計，再縫上古董Lace的長裙，Skinny設計就着得好好睇。Stella話就算係仿古衫，都堅持用真正的古董布同Lace。「古董Lace全人手製作，織出嚟嘅Pattern每個都有唔同變化，好似藝術品一樣。」買古董喱士一定要去專門店，因為佢哋有專人保養，識得修復破損，而且一般的古董喱士都會列明產地、年份、喱士編織法等。Stella︰「我自己最鍾意就係英國的HonitonLace，呢隻Lace係當年QueenVictoria至愛，佢件婚紗就係用HonitonLace布造，圖案細緻精密，相當考手工。」Honiton有如喱士之王，極有收藏價值。Stella話每次着完的古董衫只要簡單用清潔劑抹一抹，然後風亁收入衣櫃便可，保存得好的古董衫絕對有升值潛力。

■1800年BrusselsLace中袖Blouse，喱士Pattern富變化，而且柔軟不拮肉。$18,800

■Vintage白色Lace背心，用上古董Bobbin喱士，織花較大，富少女味。$10,800

■法國古董lace的特色，是在網布上織上圖畫般的Lace圖案，很有凹凸質感。$6,800

古董潮襯

維多利亞時期服飾又公主袖、又喱士邊、又低胸，非隆重如結婚等場合，都好難有機會着出嚟。點知Stella話︰「梗係唔係啦，其實古董衫可以襯牛仔褲，着法可以好潮。」Stella就揀咗一件1800年的中袖BrusselsLace上衣配牛仔褲，配OpenToe的高踭鞋，簡單已經襯出古典味道，優雅之餘唔會不倫不類，Stella︰「就算Lace上衫襯長裙一樣得，唔好被維多利亞嚇怕，其實古董衫都可以好Trendy。」而且Tulip更有PersonalConsultant，教人點揀合身形的古董衫，同配襯等。不過着到成身喱士，始終過份成熟。Stella︰「其實好多客都係30歲左右的闊太、OL，鍾意嘅款唔會好成熟。而Lace好玩之處就係佢夠千變萬化，HonitonLace細緻高雅，BobbinLace就比較活潑，不規則的布邊仲好有少女味道。」Tulip仲有自家設計的Vintage，款式較為大路。初接觸古董衫，可以由配飾入手，如新到的高山羊披肩，高質羊毛，再以人手縫上古董喱士花邊點綴，喺街更唔會同人撞款！

■古董Lace衫唔一定隆重，襯牛仔褲一樣得。（高山羊lace邊頸巾及Lace上衣售價待定）

古典上衣襯傘裙，婚禮着過之後，還可以拆散兩件再着。（米色古董Top$16,800、米色絲絨長傘裙$1,880、粉紅色Lace頭飾$880）