一團聖火，燒到全港紅噹噹。北京奧運仲未令中國同世界接軌，就已經令香港同大陸接軌。聖火所到之處，一片紅海，成條彌敦道即時赤化。八方鄭重建議，為咗表揚當日祖國同胞英勇維護聖火嘅愛國行為，將紀念港英時代第13任港督嘅彌敦道，改名做人民路，香港從此又多一個吸引內地遊客嘅景點。
香港傳遞聖火當日，有去過尖沙嘴、中環同灣仔嘅香港人，都會有一種遭受「解放」嘅感覺。嗰幾度當時兜口兜面都係手持五星旗、口操普通話嘅大陸同胞，老外不知就裏，仲以為當日係傳緊中國全運會聖火，關奧運乜嘢事？
怒漢貼有中旅社貼紙
見證住呢個歷史時刻嘅，仲有支聯會主席司徒華。當日佢同支聯會一班成員，手握民主火炬，正想操出彌敦道嘅時候，就被一大堆怒漢憤青大包圍。華叔噚日講番件事，話聽到好多人指住佢嚟鬧，絕大部份都係講普通話嘅，佢仲見到好幾個包圍佢嘅人，身上貼住中國旅行社嘅貼紙。
咦，乜原來中旅社搞咗個「五‧一護火港澳遊」？唔怪得之只有50萬人嘅澳門，前日有成25萬人上街迎接聖火咁誇張啦。咁有關方面要唔要調查一下，呢個護火團係唔係零團費，有冇迫過團友做啲唔自願嘅嘢？如果唔係，啲團友又點解咁躁火，追住示威人士又打又鬧？搞到聖火傳遞嘅和諧之旅變咗烚氣之旅。
信港人不忘六四英魂
華叔為咗祖國自由開放，不知捱過幾多人辱罵，又點會俾你班團友嚇窒。華叔話，佢老人家未驚過，嚟緊連串悼念六四19周年嘅活動，佢依然會堅持到底。噚日有記者問佢，今年六四紀念臨近北京奧運，怕唔怕大氣候向左走，冇人出席悼念活動？華叔認為，過去18年來，總有一班香港人風雨不改，走出嚟哀悼六四英靈，佢始終堅信，仍然有大批有心嘅香港人，喺適當時候就會現身表態。有咁多港人支持，華叔簡直可以化身鐵甲奇俠，為咗伸張正義，唔怕你人多蝦人少，繼續無堅不摧。
不過，鐵人都要唞吓氣，華叔𠵱家唯一要操心嘅，係自己條腰。事關早輪替國殤之柱髹油嘅時候，不慎整親條腰，仲搞到左腳骨膜炎。八方希望佢快啲好番，繼續戰鬥到底！
mailto:[email protected]