港股今次見底回升，力度遠比預期為強，上周五，恒指最高升上26374，回收26241，已完成反彈前跌幅0.5（26265）的目標。
後市向上，有兩個目標，一個係反彈前跌幅0.618的27609點，另一個係突破複式頭肩底形態的量度上升目標28800，後市整固完成後，有頗大機會升上27600，但若有力重返28000點樓上，個勢咁強，就要重新估計。
好多大價股走勢在形成複式頭肩底後，都已破位而上，個別落後嘅，好快會接力，中石油（857）已升上12元水平，且已整固多日，3條主要平均線已成強勢排列，若升破250日線（12.34元）確認中期調整完成，升浪再起，第一個目標係去年底今年初徘徊區中軸的14元水平。
今年盈利看漲
國際油價衝破100美元大關後，屢創新高，落後的石油股股價係時候發力再上，除中石油外，中油（香港）（135）亦好抵買，上周五收3.83元，比近期低位3.33元，只升番15%，但比去年10月底的7元高位，仍大跌45%，今年盈利看漲，升勢若形成，幅度必大。
06年底中油股價在4元水平，年多以來冇升過，但期內油價大升近倍，中油股價偏低得好唔合理，短期反彈重上5元水平，唔算奢望。
07年（12月年結），中油營業額38.43億元，跌1%；毛利15.24億元，跌15%；盈利13.67億元，跌20%，每股基本盈利28.23仙，末期派息12仙。去年銷油1649萬桶，減4%，平均實現油價59美元，升15%。
08年，估計中油盈利可上升至24.5億元，每股盈利0.50元，以目標價5元計，PE只係10倍；但更吸引嘅係中油旗下佔13個油田嘅權益，每股已值近20元，市場不時傳母公司中石油集團會將之私有化，空穴來風，不會無因。