商場成日搞活動吸引人流，但人流集中好容易有意外，早幾日有個市民喺旺角新世紀廣場嘅美食廣場度食食吓飯突然暈咗，商場嘅管理服務公司咁啱有部心臟復蘇機（簡稱AED）幫佢做電擊，先至救得番，仲獲消防處頒發證書嘉許㖭。
查實新鴻基地產旗下啓勝管理由上年開始，陸續喺佢哋管理嘅商場同物業，包括旺角新世紀廣場，加裝咗心臟復蘇機，又安排商場職員去考相關急救證書，早幾日個市民暈咗時，正好有位考咗急救證書嘅職員，攞埋部AED去現場，幫市民做電擊及心肺復蘇法，成功令市民恢復知覺，再送去醫院。
部AED只係一部小型電子裝置，據講如病者心跳停止後5至7分鐘內使用，救番嘅機會都超過95%。近年心臟病發嘅人越嚟越後生，而且好多時冇乜先兆，添置呢啲急救儀器都係好嘅，安裝咗唔使用到就梗係最好，但若然真有需要，救到人亦係好事。