呢排見到幾位居留在港好多年嘅外國人，有憤憤不平之意，問佢哋點解滿腹牢騷，佢哋一致話立法會喺五月五日辯論標籤法，因唔識嘢，冇國際視野嘅立法會議員佔多數，特區政府又唔考慮全局，夾硬推，標籤法大有可能通過。通過之後又點？佢哋話，到時你哋呢班香港中產就知。唔少食物會從高檔超市貨架上消失，外國人在倫敦、巴黎、紐約買得到的食物，到時都唔會在city'super，Great，Oliver's，ThreeSixty等地方出現。
左丁山平時冇留意標籤法嘅詳細內容，聽完啲外籍好友講，先知道外國人反應強烈。但係呢班外國人住在山頂、赤柱、半山區、淺水灣，手頭上選票唔夠多，當一位可能係生活最西化嘅立法會議員余若薇都唔睬佢哋之時，仲有乜事好做？
於是好心啲代佢哋打個電話問大超市之有關人士，有關人士聽到標籤法，好勞氣咁講：「我哋已經反對好耐啦，政府一於扮聾，詐聽唔到，這個年頭，香港仲未有人講smallisbeautiful（小就是美），但啲議員就一於咬實bigisugly（大就是醜），我哋反映意見，就話我哋有利益衝突，我哋閉口不言，就屈我地不反對，政府與議員完全不識市場真實（marketreality）。」
呢日趕住去馬場睇奧運火炬，離開辦公室前，接到鬼佬Ｒ電郵，呼籲所有朋友盡最後努力，向劉慧卿、余若薇兩位表面西方化議員、曾特首等表達強烈反對標籤法嘅若干內容，佢話自己最鍾意食嘅低糖果占（Smucker'slowsugarjam）將來可能冇得賣，好多外國輸入嘅健康食品冇得買，呢類食物在香港銷量少，只有外籍人，喺外國生活過回流嘅港人先至會買，一旦標籤法實施，呢類食品就費事花成本嚟迎合，放棄香港呢個小市場算數，例如FullFatLurpak（牛油）有得賣，但LessFatLurpak就會犯法，十分荒謬，鬼佬Ｒ話冇咗上述高檔小眾超市，香港會倒退十五年，鬼係國際城市呀！