曾先後主演無綫劇集《戇夫成龍》和《阿旺新傳》的郭晉安，為配合角色丁常旺，三年內兩度增肥又減肥，05年他拍攝《阿》劇後，在四個月內速減20磅，難得是他現年43歲，減磅速度快過後生仔，秘訣是糖、油、鹽三戒加戒煙、戒酒，跑步、打網球、肢體運動瘦身健體，每天早上飲暖水及服食保健中藥健脾胃，再加「外援」激光護膚，內外夾攻，難怪他自詡當下最fit！ 撰文：朱倬誼
郭晉安在02年及05年先後飾演劇集《戇夫成龍》和《阿旺新傳》中的儍仔丁常旺，因而增肥、減肥、翻脹再變瘦，每次20多磅上落，往時他平均體重約145磅，最肥居然跳升至170磅，驟變肚滿腸肥、論論盡盡。兩劇後安仔也曾兩度減肥，但經驗有別，第一次他半年減20磅，可惜錯用了近乎絕食的方法，第二次選取的方式則健康得多，且更快見效，四個月內踢走20磅肥膏。
打波最快見效
如今體重150磅、自詡精神及身體都處於人生最fit時期的安仔，自從第二次減肥後未有走樣，一直保持體重及身形，平日運動主打網球，飲食方面都注重，安仔更樂於公開他的減肥喼弗心得：「第一次拍《戇》劇時唔識，食嘢增肥，一日食好多餐，減肥時就好心急，唔食嘢，狂做運動，淨係夜晚一餐，用咗半年時間去減，但方法錯，唔食嘢對身體唔好。」
安仔續說：「第二次拍阿旺就學識點增肥減肥，增肥時照樣咁為食，將份量加倍，去泰國、日本旅行，去玩去食就一定肥。到拍完開始喼弗，每餐都有食嘢，但係食冇油冇鹽冇糖嘅食物，唔好食有脂肪嘅嘢，唔好俾脂肪囤積。我會返屋企食飯，唔贊成戒晒澱粉質，唔食會令人情緒唔穩定，易發脾氣，引致個人好攰。同埋做運動啦，跑步、做situp、打網球，我一個星期會打三、四次網球，每次打成兩、三個鐘，有時自己打，淨係開波，當做運動，四個月左右就減到。」
其實早於10年前，安仔也曾因劇集角色需要減肥，當時他服食減肥藥，結果自己攞嚟衰，他笑說：「最蠢係食減肥藥，嗰時我想快啲瘦，食減肥藥啦，一個月瘦十磅，但食藥後成日唔想食嘢，心跳加速，反而最fit係𠵱家，最唔fit係啱啱入TVB時不停開工，食唔到嘢，身體唔係咁好，係《瀛丹傳奇》（88年）以後嘅7、8年，得個捱字，瘦又唔理。」
安仔歷盡肥瘦，難得他沒有因為肥過，皮肉變鬆弛，歲月也沒有在他那張43歲的面上添上太多痕迹，當比他年小數載的黃智賢在新劇《真心英雄》中演他兄長、年小一歲的曾華倩在《古靈精探》中演他姊姊、大一歲的商天娥在《隔世追兇》中演他母親，更令觀眾驚覺已為人父的安仔有多「年輕」。
保健內外夾攻
安仔的不老是從內到外，從做激光護膚療程、均衡飲食、中藥調理，有修讀營養學的太太歐倩怡親調住家靚湯，還有正常的家庭生活、宗教信仰，這一切都可以令他變得charming，安仔說：「我覺得睡眠一定要好，每日8小時，唔使開工就早睡早起，我又戒煙戒酒，戒煙後冇肥係因為食嘢控制到，尤其係我同太太信咗基督教後，大家相處融洽咗、開心咗，冇嘢令我哋搏命追求，反而追求生命質素，希望精神上同體能上都有質素。」
安仔續說：「我哋買嘅肉要新鮮，魚要食活嘅，生活有好多趣味，食嘢都係藝術，Cindy（歐倩怡）鍾意焗嘢食，只要食物新鮮，頂多加少少鹽就夠，唔會落調味料，咁先保留到食物嘅原汁原味。平時食嘢健康，身體機能都會好啲。」
攝影：陳順禎
滅腩三部曲
大肚腩是男人中年發福的死敵，要消脂滅腩並非全無對策，安仔持之以恒勤做腹部運動，保持肚皮扁平有辦你睇。
《收腹》
日做50下situp，可操弗整個腹部，安仔建議毋須過份催谷。
《收小腌》
雙手支撐上半身，伸直舉起雙腳45度角上落，每次50下，可收緊下腹即小腌位置肌肉。
《收腰》
坐下後交叉腳曲起單膝，上半身扭側，保持動作5分鐘後，上半身扭向另一邊，再保持5分鐘，有助收腰，可鬆弛肌肉及脊骨。
美容百科：激光收毛孔
美容護膚不是女人專利，看郭富城和金城武大賣男性護膚品及化妝品的廣告，就知道男人扮靚有市場。兩年前郭晉安加入扮靚陣營，幫襯灣仔的稱美推脂美容中心，他推介每次收費約1,800元的C6納米激光治療說：「儀容好緊要，起碼俾人覺得你精精神神，印象都好啲。」
安仔續說：「我做呢隻激光後毛孔收晒，色素均勻番，平日拍戲化薄妝已經得啦。」但效果會因人而異。另外，安仔每次接受激光治療後，會順道做每次收費約1,280元的瑞士深海鱘龍魚子護膚療程，有助收緊及滋潤皮膚。至於日常護膚品，他多數選用美國PHYTO-C的抗氧化系列。
早餐要襟飽
「朝早係皇帝餐，下晝平民餐，晚上就農民餐。」安仔形容他平日三餐的feel可以大不同，自然事出有因，他說：「朝早食粟米可以飽肚好耐，午餐豐富啲，因為仲有成日可以燃燒脂肪。」
《早餐：》
麥皮/朱古力奶+烚粟米一條或雞蛋火腿通粉/米粉
《午餐：》
正常飯餐，以菜為主
《晚餐：》
白飯+烚菜+煎/炸任何肉類（不用調味料）
安仔戒了下午茶和消夜，以為他三餐淡而無味？NoWay，有「旺嫂」歐倩怡照顧，住家靚菜及愛心湯水源源不絕送上，十分滋潤。
旺嫂拿手菜
1.花生眉豆雞腳湯
2.粉葛/西洋菜/番茄薯仔魚湯
3.三文魚焗意粉
4.香橙焗雞
心水食肆
民以食為天，安仔雖然着重喼弗，但仍會偕太太穿梭港九尋找美食撐枱腳，另有一番樂趣。
新鮮海產選擇多（通記海鮮酒家）
西貢通記是出了名的明星食肆，李克勤夫婦、張家輝夫婦和杜琪峯等均是熟客，安仔最愛芝士焗龍蝦伊麵底、豉椒炒蟶子及椒鹽瀨尿蝦，他說：「永遠貨源充足，有好多嚟自唔同地方嘅海鮮，龍蝦、蜆、螺，每樣海產都有幾款選擇。」
排隊嘆叉燒拉麵（橫綱日本料理）
位於油麻地的橫綱87年開業，全店只得23個座位，拉麵是鎮店美食，安仔也因而慕名而來：「喺日本食過豬骨拉麵後，喺香港係食唔到嗰種豬骨湯底嘅拉麵，但呢間店舖係日本人開嘅，啲食物全部由日本運嚟，日日門口都排晒長龍，我最鍾意食佢嘅叉燒拉麵。」
牛肉湯河湯底濃（火車頭越南餐廳）
大坑的火車頭有名聲不單止因為該店老闆是陳伶俐密友，另一原因是其法式裝修漂亮，食物又具質素，安仔更推介該店必食是牛肉湯河：「好食在於個湯底，係好濃嘅牛骨味。」
