【本報訊】奧運聖火傳送由「風之后」李麗珊開始，到「單車王子」黃金寶結束，中途還有前泳手李穎詩大肚冲喜，又出現「女飛魚」蔡曉慧的「蝦碌」鏡頭；這班見慣大場面的著名運動健將，都異口同聲說火炬跑緊張過比賽，黃金寶更認為火炬跑的意義較奪獎牌還要大。 記者：徐嘉華、陳耀麟、林社炳、翁煜雄
細雨中，香港首枚奧運金牌得主、退役風帆運動員李麗珊，從行政長官曾蔭權手中接過祥雲火炬，沿着紅地毯跑出文化中心露天廣場，北京奧運聖火的中國之旅正式啓動。李麗珊說：「呢一刻令我諗起96年攞到金牌返香港嘅時候，同一個地方，好多市民支持，今次亦有好多市民支持自己國家舉辦嘅08奧運，畀我感覺就係好激烈、好感動。」
李穎詩大肚傳聖火
風之后見慣風浪，昨晨那團火卻累她無覺好瞓：「噚晚瞓得唔太好，始終有啲緊張，因為我唔想喺我第一棒嘅過程發生唔好嘅事。開始時仲有啲擔心，怕天雨令我喺途中滑倒，但睇到市民喺路旁熱烈打氣，就乜嘢擔心都蓋過咗。」96年奧運滑浪風帆金牌得主李麗珊，跑完第一棒後說。
特別從深圳龍崗練車後回港參加火炬跑的黃金寶，對於自己做香港最後一棒的火炬手感到光榮，他又說火炬跑比拿金牌不一樣，「攞金牌係好個人嘅事，好個人感受。火炬跑係全港市民嘅事，好開心，亦好多謝香港市民上街支持我哋。」
數到跑得最「過癮」的，首推94年曾為香港奪得廣島亞運4×100米自由泳接力賽銀牌得主、現懷孕七個多月的李穎詩。因為她一家三口，包括任海關的丈夫林先生及肚裏的女兒，都一齊參與火炬跑。她說：「我丈夫有份扒其中一隻護航嘅龍舟，而我就同肚裏面嘅BB女齊齊跑沙田區；我同丈夫正考慮為個女改名叫『祥雲』或『歡歡』，以紀念這次盛事。」
蔡曉慧呆等五分鐘
由於火炬跑比預定時間完成得早，所以跑第117位（尾3位）的蔡曉慧，在完成其火炬跑後無端要呆等超過五分鐘。她笑說：「其實我嘅路段都好順，但到交給王晨時，由於比預定時間早咗15分鐘，為咗拉近同黃金寶開步嘅目標時間五點鐘，所以我交畀王晨之後仍然唔能夠離開。我又唔知鏡頭仍然對住我，於是同王晨傾偈，又將火炬放喺膊頭上面，有啲蝦碌，但亦好難忘。」
