小妹寫咗呢個blog，唔經唔覺都有一年，好在個樣同身材都keep得幾好。不過，港股就唔多好，由舊年升到三萬幾點，跌到得番二萬幾點，加埋通脹，搞到啲人唔多願消費。米價仲係咁升，升到啲人搶米，真係諗都諗唔到，連阿媽都走嚟問，話我識得人多，邊度有平米賣。
早幾日收到啲網友同小妹報料話，慈雲山屋邨有人擺街邊檔sell米，25公斤裝泰國香米賣280蚊，認真搞笑。佢仲派埋卡片，一包都送貨。聽落都好似平過米舖喎。小妹根據線報，噚日打電話畀呢間街邊檔探吓口風，接聽嘅哥哥仔話，佢係食米批發商，以前淨係賣米畀米舖，𠵱家試吓直接賣米畀啲客，上月底咪喺慈雲山擺街邊宣傳囉。因為係批發價，比零售價大約平一成，不過，呢幾日啲米又漲價，每包賣300蚊。收到，即刻通知阿媽。其實大家見到邊度有平嘢賣，或者識得啲人點精打細算消費，都可以send個email過嚟報料，小妹新加咗個電郵mailto:[email protected]。
逢周六、周日刊出