一日做到晚，晚上回家吃完飯，已是九時過外，於是開住電視睇戲或睇波，以紓緩成日拉得緊緊嘅腦袋，西化啲講，就係unwind，到咗十點半後，就要上床睡覺，準備次日好早就起身搏命。如此生涯，好似幾辛苦，左丁山生成一條勞碌命，捱慣咗就唔覺得太辛苦。因是之故，睇《信報》徐詠璇不時評彈無綫戲劇、無綫節目，覺得呢位朋友都幾好命，可以準時放工回家睇黃金時間電視節目也。
徐詠璇講咗幾日無綫「一百萬人」，原來係晚上十時半至十一時半播出，左丁山完全冇睇過。上星期二中午與報紙Ｍ吃午飯，佢話好頂唔順陳志雲嘩眾取寵，搞個大批鬥節目出嚟，令佢想起幾十年前鄉下啲貧下中農由黨領導召集，集體數臭戰前地主剝削農民，朱門酒肉臭之事，覺得好唔舒服。報紙Ｍ話：「莫非無綫電視想鬥垮鬥臭資本家與有錢階級？嗰位張超雄議員講到比共產黨更共產。」左丁山冇睇過節目，答不上嘴，只好講：「無綫要搶收視率啫啩，面對亞視呢班無綫叛將，陳志雲梗係要諗辦法一棍打殘佢哋嘅，度橋諗出呢類而香港最多（以人數計）、最基層嘅觀眾有切身關係嘅節目，收視率一定好，廣告自然嚟啦！」
報紙Ｍ話：「收視率或者會好，但有冇廣告長期支持我就唔敢講。喂，呢類貧窮節目適合乜嘢產品賣廣告呀？地產豪宅呀？銀行投資呀？護膚美容呀？汽車、高清電視呀？統統不合節目氣氛啫」。報紙Ｍ對廣告商心理素來有研究，左丁山唔敢同佢駁。佢係有道理嘅，譬如《金融時報》隨報附送一份HowtoSpendIt特輯，內裏啲高級廣告應有盡有，市面上報刊冇一份有咁高格調嘅，呢類廣告一定唔會刊登在免費報紙、免費雜誌上。但話得說回頭，或者無綫唔志在廣告，只求所謂「正義」呢？胡錦濤、溫家寶等中央要人喺四月二十八日集體上課學習經濟，無綫如果認真地做節目，以示關心清貧市民，應該向胡總溫總，上番一堂經濟課，近近哋就請科大雷鼎鳴教授主持啦，如果仲係嫌遠，行過隔籬搵鄰居《蘋果》嘅李兆富、孫柏文亦得。