迎接奧運聖火乃嚴肅使命，無綫昨日特意安排過百藝員、歌星在奧海城表演助興，唱出勵志歌曲以示支持中國，陳豪及陳法拉等小生花旦均有份持咪領唱，可惜藝員未有背熟歌詞，以致頻頻甩嘴及入錯key，司儀鄭裕玲又因場面混亂發爛渣，令活動波折頻生。
無綫昨日在奧海城戶外舉行《香港全民迎聖火》活動，有份出席藝員包括陳豪、林峯、黃宗澤、陳法拉、楊怡、薛家燕等，為了隆重其事，無綫昨日特別停廠，行政長官曾蔭權亦趕及到奧海城主持開幕禮，還親身走到台下傳大型氣球到群眾手中，之後又打鼓贈興。
冇時間綵排
活動現場直播期間，因為流程表不斷改動，令司儀鄭裕玲（嘟嘟姐）無所適從，當場發難與工作人員理論，並大呼：「你諗清楚未，究竟唱歌定講嘢先。」當時只見嘟嘟姐一臉怒火，完騷後她直認好𤷪，嘟嘟姐說：「因為冇時間綵排，早上又落雨，加上直播好混亂，有啲交接位都唔知做乜，不過我𤷪完就冇事。」
為支持中國，昨日眾嘉賓均穿上紅衣，在表演項目中亦以獻唱勵志歌曲為主題，其中由陳豪率領唱出《前程錦繡》一曲時，明顯有入錯key及甩嘴情況，陳豪說：「台上表演都係希望帶畀觀眾開心氣氛，娛樂大家，我都係今日先收到歌詞，有啲歌都未聽過，而且今日大家只得幾分鐘綵排，難免有啲混亂。」
認準備不足
稍後到陳法拉及楊怡領唱《喜氣洋洋》時情況更嚴重，幸好有家燕姐從旁協助，才勉強完成，二人同樣承認甩嘴，希望觀眾不要見怪，陳法拉說：「覺得今日意義重大，不過啲歌詞真係到場先收到，準備不足，主要都係氣氛啫，大家嘅表現都幾好。」
採訪：卓寶花、馬建華
攝影：陳志嵐
