5月5日是墨西哥CincodeMayo節，是慶祝自由、民主的日子，當地人或是居於美國的墨西哥人都好重視這個節日，情況等同墨西哥獨立日一樣重要，大家趁機一齊飲酒狂歡大擦一餐，情況好熱鬧。曾在美國生活的Deseree也感受過這種熱鬧氣氛，所以她今日特別介紹充滿墨西哥風味的派對小食介紹給大家。
記者：黃潔蓮
攝影：梁細權
示範：派對專家Deseree
大廚簡介
派對專家Deseree，自從嫁了一個美國人，自此養尊處優的闊太，得閒無事最愛整東整西，烹調各國美食宴請親朋，最擅長煮西餐。
墨西哥朱古力慕絲
4人份
時間：30分鐘（未計雪凍時間）
朱古力慕絲做得多，但墨西哥式做法是要點火去令酒精揮發，火燒後更能誘發朱古力香氣。
材料
朱古力9安士、牛奶1/4杯、鹽1/4茶匙、肉桂粉1茶匙、冧酒6湯匙、忌廉11/2杯、辣椒粉（CayennePepper）適量
做法
1.先把朱古力、肉桂粉、牛奶和鹽放進平底鍋，以中火加熱，攪拌至朱古力完全溶掉。
2.加冧酒入朱古力漿中，用長火柴迅速將冧酒燃點，小心攪拌至火熄滅。把朱古力漿倒進大碗中，冷卻至室溫，待用。
3.拂忌廉至七成硬，混入朱古力漿拌勻。
4.將朱古力慕絲倒進杯中，每杯約t滿。置雪櫃雪最少3小時至1天至凝固，將墨西哥朱古力慕絲伴以辣椒粉，一同品嚐。
Mandy：冧酒有好多種，用邊種至啱？
答：用白冧酒會好啲，因用橡木桶發酵，所以味較濃。
牛油果醬（Guacamole）
4人份
時間：15分鐘（未計雪凍時間）
牛油果在墨西哥人眼中係「窮人牛油」，好滑、但係佢係不飽和脂肪，好健康有益，配搭粟米片或搽麵包都好好味。
材料
牛油果4個、青檸汁2至3湯匙、紅洋葱1/2個（切粒）、蒜頭1粒、墨西哥青辣椒（JalapenoChilies）1個（切碎）、番茄2個（切粒）、芫荽1/4杯、特醇橄欖油適量、鹽/黑胡椒各少許
做法
1.切開牛油果並除去果核，把果肉挑進大碗中，用叉把牛油果壓爛，不要壓得太爛，留有一點口感。
2.加餘下材料輕輕攪拌，用保鮮紙直接蓋封牛油果醬上，使不會變色，放進雪櫃冷藏1小時。可配以墨西哥粟米片伴食即可。
Kendy：怎樣挑選靚的牛油果？
答：外皮顏色要夠黑，按下去帶點彈性才為之熟，過熟會爛果肉發黑。
香辣魚柳卷餅
4人份
時間：40分鐘
卷餅種類有好多，有些用粟米粉做，亦有用麵粉做，除了原味之外，又有甘笋味、菠菜味、番茄味、芫荽味，視乎你自己口味可以配搭唔同肉類，變化可以好多。
材料
魚柳6塊、青檸1個、Fajita調味料4茶匙、鹽2茶匙、玉米粉（Cornmeal）11/2杯、菜油適量、墨西哥薄餅（Tortilla）4塊
配菜：生菜4片、牛油果醬適量
芒果薩爾薩辣醬（MangoSalsa）
材料：芒果1個（切粒）、墨西哥青辣椒1隻（切粒）、蒜頭1粒（剁碎）、青檸汁1茶匙、紅洋葱粒/芫荽碎各1茶匙、鹽適量
做法
1.先把魚肉用青檸汁、鹽及2茶匙Fajita調味料醃片刻。
2.做芒果薩爾薩辣醬：把所有材料拌勻，放進雪櫃冷藏。
3.墨西哥薄餅用錫紙包好放入180℃焗爐焗約15分鐘至暖和，取出用布包裹保溫。
4.玉米粉與餘下Fajita調味料拌勻，然後把魚柳沾上已經調味玉米粉，待用。倒油到鍋至11/2吋深，加熱至175℃。分批把魚放進炸2至3分鐘至金黃色，完成後用廚房紙把油索亁。
5.把炸好的魚切件，用墨西哥薄餅包裹生菜、芒果薩爾薩辣醬及牛油果醬伴食。
Erica：玉米粉與粟粉有何分別？炸出來的效果會不同嗎？
答：炸粉都脆，但用玉米粉，就會有粒粒口感，生粉會較硬。
墨西哥青檸雞湯
6人份
時間：20分鐘
這個湯好清，因為加了青檸汁，味道會酸酸咪；加埋墨西哥Jalapeno辣椒，又帶點辣味，好似泰國冬蔭功咁醒胃。
材料
蒜頭6粒（切片）、Fajita調味料2茶匙、雞胸肉2件（切片）、雞湯2公升、青檸汁1/3杯、墨西哥粟米片11/2杯、牛油果2個、番茄1個（切角）、葱/芫荽各少許、墨西哥青辣椒適量、鹽、胡椒適量
做法
1.用橄欖油以中小火爆香蒜片及Fajita調味料等炒香，加入雞胸肉炒約2分鐘。
2.將雞湯煮滾，加入雞胸肉煮滾後熄火，加入青檸汁、鹽和胡椒作調味。
3.把湯分成六碗，加入牛油果片、番茄、葱碎、芫荽和墨西哥辣椒。以青檸作裝飾，墨西哥粟米片伴食即成。
布小姐：何謂Fajita調味料？在那裏可以買到？
答：Fajita係墨西哥人的MagicPowder，幾乎煮乜都會加少少入去，佢入面有辣椒、小茴香粉、牛至、芫荽粉等等。在Oliver可買到。
網上重溫
http://cooking.appledaily.com