女同事Amy近排成日頭暈暈兼面青唇白，時不時要請病假，睇咗好多醫生都無乜結果，中醫就話佢血氣唔夠，建議食豬膶或飲豬膶水補吓，但Amy份人好貪靚，呢幾年改咗食素keepfit，食豬膶真係noway，所以佢成日問有無啲唔使食肉嘅補血秘方，湖南中南大學湘雅醫院營養科教授李惠明寫咗篇蔬果補血嘅文章，推薦畀Amy之餘，都同大家分享吓。
中國人鍾意食豬膶補血，但食得動物內臟多都唔係好健康，其實好多蔬果都有補血效果，好似南瓜咁，營養好豐富，含有鈣、鈷、鋅、鐵及磷等，其中鈷係構成血紅細胞嘅重要成份之一，鋅同鐵都係造血嘅重要元素，曾經有中醫形容南瓜係「補血妙品」。
食紅棗好過做facial
好多人都以為甘蔗淨係用嚟清熱，其實甘蔗含有大量鐵、鈣同鋅等人體必需嘅微量元素，每公斤甘蔗就有九毫克鐵，可以話係水果中嘅「鐵王」。另外，提子都有補氣血強筋骨嘅功效，好多中醫都將提子奉為補血佳品，因為提子含有豐富嘅葡萄糖、鈣、磷同鐵，最啱長者、婦女、過度疲勞同氣虛體弱嘅人用嚟補血。
至於補血極品紅棗應該唔使我多介紹，好多女士都會飲自製紅棗茶補血，紅棗含有豐富維他命、果糖同胺基酸，可以調節新陳代謝，增強骨髓造血功能。話時話，紅棗仲有一種好多人未必知嘅功效，因為可以促進細胞生長，女士食得紅棗令皮膚變得光滑細膩，增加彈性，若體質適合，女士們食多啲紅棗隨時好過去美容院「做facial」。
blog主：醫神