不諱言第一下聽到要去菲律賓克拉克，我唔知係乜，扮晒不驚奇地收了線，腦中泛起勁多問號！在未清醒之下被推了上飛機，直到雙腳踩在克拉克地面，才哇一聲叫出來，哦，拍《賭場風雲》嗰度，以為賭之外乜都冇，結果搞到手軟軟返港，只因打golf太平！
記者、攝影：劉嘉蕙
菲式推油勁舒服
《賭場風雲》由首播變重播，歐陽Bobby提名艾美獎又輸咗，克拉克竟變好了。今時今日，人家賭場依然健在，個個入去都自稱有斬獲，與此同時，度假城除了昔日的情調小屋之外，還開多了一棟酒店，Spa場大肆擴張，仲新增Golf場。
去克拉克不難，現時廣州及澳門都有直航機前往，香港出發的話，馬尼拉搭車約兩小時到。樂壇新人區俊濤（Toto)同張苡澂（Venus），一到埗即刻話要來個馬殺雞（massage）。度假村SpaCentre老實說不算十分大，不過基本如中泰式按摩及腳底按摩一樣都冇少到，連小冷門瑞典按摩都有。當然山長水遠去到菲律賓，點可以唔感受吓異國風情？地頭貨菲式按摩即係一般認知的推油，當地原裝菲籍技師很是熱情，手勢之佳不在話下，連筋骨尚算活絡的我，都舒服到忍唔住叫加鐘。
飄浮NightMovie
水上樂園是度假城一大賣點，麻雀雖小但設備完善，玩樂項目包括超長5層樓高滑水梯、人工大浪、飄流河、兒童嬉水區、噴水區等，地方唔大但夠玩有突，所以一到假日，經常有當地人拖仔帶女去幫襯。玩水上樂園亦唔係得日頭有得玩，場內更設有NightMovie，啲媽媽浮住水睇池上大投射銀幕，感覺都幾超現實。拍攝現場Toto同Venus都大叫好玩，Venus仲Crazy到整損手，好彩不是賭到損手啫。
克拉克度假城高球場是園內新設施，目前開到9洞，基本消費$72，租器材另加$90，換言之不用港紙2百蚊，旨在過癮的話，這個消費超級抵，小心打到手軟。而且當地個天實在藍得好靚，加埋菲律賓棕櫚樹，每個角落都好似一幅畫。對住如斯美景，心情好難唔好，Toto同Venus冒住30幾度暴曬天氣，都影得勁開心，Toto仲即席玩田野飛車，嚇到Venus花容失色。
廿倍大樂富中心
克拉克度假村每日有接駁車直出附近最大ShoppingMallSMCity，方便客人盡情購物，兼出去市區嘆地道菜式。個Mall格局是樂富中心，舖仔勁親民，不過面積是廿倍，仲有得玩摩天輪旋轉木馬同小火車，話一日行唔晒毫不誇張。SMCity最好是買人字鞋，七彩繽紛的拖鞋由下至上由左至右排列，同某潮舖款式似足8成，為港紙十蚊對咋！
掃完鞋，勁推介場內另一人氣景點，超市是也。掃芒果亁是指定動作，仲有位剩，行埋去冰品櫃啦，菲律賓雪糕口味很多，有車打芝士、牛油果、椰青搭荔枝等香港少見的味道，有團友話芝士味味道一流，價錢約$5.5一杯，結果眾人去到機場都忍唔住外pack亁冰拎走。超市附近有一檔仔賣炒雪糕，捲埋像蛋卷，入口質感跟一般雪糕不同，更是必食推介。
克拉克度假城（FontanaLeisureParks）
地址：ClaroM,RectoHighwayClarkSpecialEconomicZoneClarkField,Pampanga2009Philippines
房價：$600起
查詢： http://www.jimei.com.hk（集美集團）
出門提一提
簽證:持BNO或特區護照人士免簽證。查詢：28238501（菲律賓領事館）
機票：菲律賓航空來回馬尼拉，價錢$1,020起。查詢：23900421（學聯旅遊）
電壓：220V，兩腳扁平插頭
貨幣：1披索約0.18港元（文中價錢已折算為港幣）
下周馬尼拉天晴，28-31℃
